Дагъустанда тарихда сифте яз республикадин халкьарин Спартакиада кьиле фида. 26-августдиз Махачкъалада адаз гьазурвал акунин месэлайриз талукьарнавай совещание кьиле фена.
Спортдин чIехи мярекат 3-сентябрдилай 30-сентябрдалди давам жеда. Ам Дагъустандин Халкьарин садвилин йикъаз, ЧIехи Гъалибвилин 80 йис тамам хьуниз ва Ватан хуьдайбурун йисаз талукьарна тешкилзава.
Спартакиада ачухуниз талукьарнавай мярекатни иштиракчийрин парад 20-сентябрдиз республикадин меркезда авай «Труд» стадиондал кьиле фида. Спортдин акъажунра Дагъустандин вири шегьерринни районрин командайри иштиракда. Абуру, спортдин Олимпиададин къугъунрик кутунвай жуьрейрилай гатIунна (азаддиз юкьварар кьун, бокс, дзюдо, кьезил атлектика…), милли жуьрейрал къведалди (къван гадарун, алай чкадилай хкадарун, цIил ялун…) чпин къуватар алцумда.
Республикадин уьмуьрда кьиле фидай спортдин чIехи вакъиадин мярекатар Махачкъалада «Труд» стадиондал ва Каспийскда Али Алиеван тIварцIихъ галай спортдин маканда тешкилда.
Чи мухбир
