Дагъустандин Яшайишдин фондуниз зегьмет хуьнай харжияр эвез авун (компенсация) патал вахтундамаз, яни 1-августдалди, Дагъустандин 37 работодателди арзаяр гана, лазим документар рекье туна. ИкI, зегьметчийрин кIвалахдин шартIар хъсанарунай ва хатасузвал таъминарунай авунвай харжийрай 37 работодателдив 14, 5 миллион манатдин кьадарда аваз эвездин пулар агакьда.
Чешмедин малуматда гъавурда тунвайвал, федеральный закондин бинедаллаз ихьтин куьмек идарайра, карханайра зегьмет чIугвазвай ксарин кIвалахдин шартIар хъсанарун ва хатасузвал таъминарун патал кьиле тухузвай серенжемриз харжзавай такьатрин 20 процентдал къведалди пул эвездай вахкузва. Ихьтин серенжемрик лагьайтIа, мисал яз, ИЗ-дин (индивидуальная защита) такьатар, зегьметдин шартIарин махсус гьалдиз къимет гун, зегьмет хуьнин рекье чирвилер къачун ва мсб акатзава.
— Арзаяр вахтундамаз гунихъ еке важиблувал ава, гьикI хьи, Дагъустандин работодателрив абурун бинедаллаз гьукуматдин патай куьмек агакьзава. Ида зегьметчияр патал къулай ва хатасуз шартIар арадал гъунин важиблувал къалурзава. Вахтундамаз арза ва документар тIвар кьунвай идарадиз рекье тун эвездин пул агакьунин заминвал я, — къейдна СФР-дин Дагъустанда авай отделенидин управляющий Алжанат Загьидовади.
ИкI, эвездин пул вахчудай ният авай работодателри гила алай йисан 15-ноябрдалди арзаяр, документар агакьарун лазим я. Кьилди къачуртIа, иник зегьмет хуьн патал кьилиз акъуднавай серенжемрин харжияр къалурзавай гьахъ-гьисаб (икьрарар, актар, пулдин квитанцияр ва икI мад) акатзава. И гьахъ-гьисабдилай эвездин пулдин кьадар аслу жезва.
И месэладай гегьенш малуматар квевай, страхователар патал региондин алакъадин центрадиз зенгна, чириз жеда. КIвалахзавай вахт: ислен-хемис йикъара — пакаман сятдин 9-далай нянин сятдин 6-далди, жуьмядиз — пакаман сятдин 9-далай нянин сятдин 5 тамам жез 15 декьикьа амаз. Телефондин нумра: 8 (8722) 98-73-26.
Чи мухбир
