Алай йисан 15-августдиз Ингушетия Республикада Советрин Союздин Игит, Дагъустандин летчик Валентин Эмироваз гуьмбет ачухна. Мярекатда, къунши республикадин кьил Магьмуд-Али Калиматова теклифуналди, РД-дин Кьил Сергей Меликовани иштиракна.
Игитдиз талукь монумент Агъа Ачалук хуьруьн Т. Цурован тIварунихъ галай энергетикадин колледждин мулкуна эцигнава.
Майдин вацра Магьмуд-Али Калиматова Сергей Меликоваз мемориал ачухуниз талукь мярекатда иштиракун патал теклифнай. Риваятдиз элкъвенвай летчик Валентин Эмиров 1942-йисан сентябрдиз Ингушетиядин чилел телеф хьанай.
«Ингушетиядиз атайла, зурба дагъустанви рикIел хкун ва адаз гьуьрмет авун чи намусдин кар я», — къейдна Дагъустандин регьберди. Ингушетиядиз фейи делегациядик Дагъустан Республикадин Кьилин ва Гьукуматдин Администрациядин, Халкьдин Собранидин, Гьукуматдин, жемиятдин тешкилатрин векилар квай.
Сергей Меликова дагъустанви Валентин Эмиров эбеди яз рикIел хуьзвай Ингушетиядин халкьдиз ва регьбердиз сагърай лагьана.
«РикIелай тефидай, эбеди баркаллувал, кьегьалвал авайди я. Ихьтин ивирарни Ватандин ЧIехи дяведа къачунвай Гъалибвилихъ галаз алакъалу я. Гъилевай йисуз чна ЧIехи Гъалибвилин 80 йисан юбилей гегьеншдаказ къейдна. Къе чун Ингушетиядин бахтавар чилел риваятдиз элкъвенвай военный летчик, авиациядин истребителрин полкунин командир, Советрин Союздин Игит Валентин Эмироваз гуьмбет ачухдай чкадал кIватI хьанва.
Дагъустандин халкьдин ва кьилди зи тIварунихъайни, гьуьрметлу Магьмуд-Али Макшарипович, чи ватанэгьли рикIел хуьнай квез ва Ингушетиядин вири халкьдиз сагърай лугьуз кIанзава. Чун къуншияр хьиз, чи адетар, тарих, культурани сад-садаз ухшарбур я. Ихтибарвал, ачухвал, гьуьрмет авун, кIеве гьатай вахтунда сад-садаз куьмекдиз атун чи стха халкьарин арада гьамиша амукьдай дуствилин алакъаяр я», — къейдна РД-дин регьберди.
Ада Кавказ патал кьиле фейи женгни рикIел хкана. Моздок шегьердин цава фашистрин 6 истребителдихъ галаз кьиле фейи женг къизгъинди хьана. Дагъустанвиди душмандин са самолет яна, гадарна. Адан вичин самолетдихъни гуьллеяр галукьна. ГьакI ятIани, Валентин Эмирова вичин самолет душмандин истребителдал гьална ва амни тергна. Самолетдай хкадарнатIани, Игит летчик парашют ахъа жедалди чилел аватна.
«Чи ватанэгьлидин тIварцIихъ Дагъустанда куьчеяр, школаяр янава. Адан хайи хуьре Ахцегьа гуьмбет ава. Ингушетиядин чилелни Игитдиз гуьмбет ачухун чун патал важиблу я», — лагьана Сергей Меликова.
Дагъустандин регьберди къенин несилди бубайрин крар давамаруниз кьилин фикир гана.
«Алай вахт четинди ятIани, ада игитар майдандиз акъудзава. Абур патал Ватан, ватанпересвал гафар гьакIанбур туш. Ихьтин игитрин арада Валентин Эмирован тухумдин несилдикай жезвай ва гьадан тIвар алай Валентин Эмировни ава. Мотострелковый батальондин аскер, «Жуьрэтлувиляй» ордендиз лайихлу хьайи кьегьал 2023-йисан 28-февралдиз, дяведин махсус серенжемда вичин везифаяр кьилиз акъуддайла телеф хьана.
Чи чIехи бубайрин ва бубайрин баркаллу крар викIегьвилелди тамамарзавайбурун арада Россиядин Федерациядин Игит Энвер Набиев, «Жуьрэтлувиляй» пуд ордендин сагьиб Мегьамед Валихов ава», — лагьана Сергей Меликова.
Ингушетиядин кьил Магьмуд-Али Калиматова мугьманвилиз атунай Сергей Меликоваз рикIин сидкьидай сагърай лагьана.
«Чи кьве республика Советрин Союздин Игит, летчик-истребитель Валентин Эмирован игитвал себеб яз мадни мукьва, Дагъустандин агьали чун патал жуьрэтлувилин ва буржидиз вафалувилин ярж хьанва. Ватандин ЧIехи дяведин йисара Малгобек райондин чилел фашистрихъ галаз кьиле фейи женгина къалурай игитвили чи халкьар сад-садаз мукьва авунва. Къе, чи уьлкведин вилик кьетIен имтигьанар ва везифаяр акъвазнавайла, чаз тарихдин гьахълувал хуьдай, гьуьрмет ийидай ва чи садвал мадни мягькемардай игьтияж ава.
И мемориалдал къвезвай гьар са касди чи бубайри гъалибвал гьикI къазанмишайди ятIа, рикIел хкун лазим я. Гьа вахтунда абур ислягьвал мягькемарна, чи бубайрин, чIехи бубайрин къазанмишунар хвена кIанзавайдан гъавурда акьада», — лагьана Ингушетиядин регьберди.
Ингушетияда мугьманвиле авайла, Сергей Меликов Магьмуд-Али Калиматовахъ галаз кьилди гуьруьшмиш хьана ва абуру гележегда санал кIвалахунин гьакъиндай веревирдер авуна.
Тамамдиз и мярекатдикай РД-дин Кьилин сайтдай кIелиз жеда.
Хийир Эмиров
