СтIал Сулейманан райондин Птидхуьрел ихьтин тIвар анин бине кутур касдин тIварцIихъ галаз алакъалу яз акьалтна. Хуьр арадал атай вахт малум туш. Птидхуьр Кьасумхуьруьвай 14 километрдин кьибле патахъ яргъа мензилда экIя хьанва. Къуншидал Татарханрин хуьр ала.
Инкъилаб жедалди вилик Птидхуьр ДаркIуш, КIахцугъ, Татарханрин хуьр, Вини Ярагъ хуьрерихъ галаз санал Куьре округдин Гуьне наиблухдин Татархандин жемиятдик (общество) акатзавай.
Хуьруьн рагъакIидай пата архитектурадин гуьмбет ава — мискIин. Птидхуьруьнвияр асиррилай асирралди лежбервилел, мал-хеб хуьнал машгъул хьана.
1886-йисан переписдин делилралди, Птидхуьре 34 майишат авай, 191 кас яшамиш жезвай. Абурукай 107 итимар тир, 84 кас — дишегьлияр.
Алай вахтунда хуьре 81 кIвал ва 275 агьали ава. Хуьре Фергьятар, ЙизитIар, Шалбузар тIварар алай тухумар ава. Птидхуьр Уллу-Гъетягърин хуьруьн администрациядик акатзава.
Мурад Мегьамедкеримован «СтIал Сулейманан район: тарихдин гелерай» ктабдай
