Гьуьрметлу «Лезги газетдин» редакция! ДГУ-дин филологиядин факультетдин урус ва Дагъустандин чIаларин отделенида кIелзавай йисара чун, студентар, халкьдин сивин яратмишунар кIватIун патал хуьрериз рекье твадай. И месэла тамам са имтигьан хьиз гьисабзавай. Чна чIехи бубайривай, дидейривай жуьреба-жуьре шиирар, манияр, кьисаяр кIватIдай, абур дафтарра кхьидай ва университетдиз вахкудай. И кар за университет акьалтIарайдалай кьулухъни давам хьана.
Икьван йисара студентри кIватIай материалрин бинедаллаз лезги халкьдин фольклордиз талукь са шумуд том чапдай акъудиз хьун мумкин я. Ахьтин ктабар маса къачудайбурни тIимил жедач. Малум тирвал, вири и материалар чи гьуьрметлу алим Гьажи Гашарован гуьзчивилик квай. Абур алай вахтунда нив гватIа, гьина аватIа тайинарна майдандиз акъуднайтIа, хъсан тир.
Мад са фикир. Алим Гъалиб Садыкъидин ктабханада идалай вилик яшамиш хьайи жуьреба-жуьре алимрин, шаиррин араб, фарс, лезги чIаларал кхьенвай гъилин хатIарин чешмеяр авай. Абурун арада икьван чIавалди санани чап тахьанвай надир материаларни хьун мумкин я.
Алим Гъалиб Садыкъи къе чи арада амач. Адан девлетлу ирс, ктабханада адан хва Ариф Садыкъидив гва. Чахъ, лезгийрихъ, чпихъ хъсан мумкинвилер авай, мергьяматлу крарик кьил кутазвай векилар тIимил авач. Ахьтинбур желбна, Гъалиб Садыкъидин архивда авай гъилин хатIарин чешмейриз дуьнья къалурнайтIа, кутугай кар жедай.
Бикеханум Алибегова, шаир
