Алатай гьафтеда Росгвардиядин Дагъустан Республикада авай Управленидин «Скорпион-Каспий» ОМОН-дин (отряд милиции особого назначения) къуллугъчияр, «Росгвардиядихъ галаз рухсат» серенжемдин сергьятра аваз, Къарабудахкент районда кардик квай аялрин «Солнечный берег» лагердиз мугьман хьана. Алай вахтунда ана, чи республикадай хьиз, Курскдин ва Запорожьедин областрай тир аялрини ял язава.
ОМОН-дин къуллугъчийри гуьруьш спортдин зарядкадилай башламишна. Ам машгьур спортсмен, отрядда къуллугъдин ва физический рекьяй пешекарвилин гьазурвилерин дестедин инструктор, полициядин старший лейтенант А. Русланан регьбервилик кваз кьиле фена. Ада аялриз яракьдикайни суьгьбетна, Калашникован автомат ва Макарован тапанчи чукIурунай ва кIватIунай мастер-классар къалурна.
ОМОН-да сиясатдиз талукь кIвалах тухунай отделенидин пешекар, полициядин капитан О. Шагалая, вичин нубатдай яз, аялриз милли гвардиядин кьушунра къуллугъдикай, абуру кьилиз акъудзавай везифайрикай, гележегдин росгвардейчидихъ гьихьтин ерияр хьун лазим ятIа, суьгьбетна.
Гуьруьшдин эхиримжи пай аялриз иллаки бегенмиш хьана. ОМОН-дин мл. инспектор-кинолог, полициядин старший прапорщик Г. Мегьамедзапира ва кьуд кIвач квай адан дустуни — «Джек» лакIаб алай немсерин овчаркади — къалурай алакьунри аялрин гуьгьуьлар хкажна. КицIерикай, кьуд кIвач квай гъвечIи дустари кьилиз акъудзавай важиблу везифайрикай, спецназда кинологвилин къуллугъдикай инспектордин-кинологдин суьгьбетдихъни аялри дикъетдивди яб акална.
— Ихьтин серенжемри, «жанлу» гуьруьшри аялар ватанпересвилин руьгьдаллаз тербияламишиз куьмекзава, гьакIни абур сагълам уьмуьр кьиле тухунал ва спортдал машгъул хьунал желбзава. КьетIендаказ мадни а кар къейд ийиз кIанзава хьи, аялри чи къуллугъдикай еке итиждивди хабарар кьазва, гележегда чпин уьмуьр Ватан хуьдайбурун пешедихъ галаз алакъалу ийиз кIандайбурун кьадарни тIимил туш, — къейдна А. Руслана.
Лагердин кьиле авай ксари аялриз яргъалди рикIел аламукьдай легьзеяр багъишунай Росгвардиядин къуллугъчийриз сагърай лагьана.
Регина Семедова
