Ракьун рекьин работникрин йикъан вилик «Дербент» станциядал цIийиз туькIуьр хъувунвай перрон шад гьалара ачухна.

Ана «РЖД» ОАО-дин Кеферпатан Кавказдин ракьун рекьерин отделени­дин начальникдин заместитель Захар Адамова, Дербент шегьердин администрациядин кьилин заместитель Агъамирзе Агъамирзоева, ракьун рекьин вокзалдин векилри, Махачкъаладай атанвай мугьманри, пассажирри ва чкадин агьалийри иштиракна.

Перрон ачухунин гьуьрметдин ихтияр Захар Адамоваз ва  Агъамирзе Агъамирзоеваз гана.

З. Адамова ерилу кIвалахдай ва планда къалурнавай вахтун­да объект вахкунай эцигунардайбуруз сагърай ла­гьана.

А. Агъамирзоева Дербент шегьердин кьилин патай мугьманризни шегьерэгьлийриз мярекат мубаракна. Ада ракьун рекьерин вокзалдал шегьерэгьлийризни мугьманриз къулай шартIар арадал гъуналди, физ хквезвай пассажиррин, гьакIни Россиядин регионрай къвезвай туристрин кьадар артух жезвайди къейдна.

Мярекатдал республикадинни шегьердин кьиле авайбурулай разивилин келимаяр ракьун рекьерин улакьрин ветеран Гьасанбег Бабаева ва жемиятдин векил, музейдин къуллугъчи Гуьлпери Мирзебалаевади лагьана.

Къагьриман Ибрагьимов