Цналви Шихмегьамед Агьмедова вичин ктабдиз «Къванцин беневша» тIвар ганва. Шихмегьамед Агьмедов милли эдебиятдин майдандал цIийиз экъечIнавай кас я. Адан са шумуд шиир «Лезги газетдиз» акъат­на. Хайи маканда, Россиядин регионра лежбервал, малдарвал, фялевал авур итим, ругуд аялдин буба алай вах­тунда уьмуьрдин юлдашни галаз Каспийск шегьерда яшамиш жезва­. Чна адаз сад лагьай ктаб чапдай акъатун мубаракзава. Гъиле кьвед лагьай ктабни ава. Ам касди урус чIалал кхьизва.

Ктабда гьа ихьтин тIвар алай поэмани ганва. Ватанпересвилин гьиссерал алаз теснифнавай эсерда шаир­ди хайи маканар душманрикай хуьзвай кьегьалрин — Гьажи Давудан, Къагьриманан, Къагьриманан кIани руш Гуь­луьс­танан ва масабурун къаматар яратмишнава.

Ктаб «Заз акурди ахвар туш, лап дугъри я…», «Зун и патай килигзава дагълариз…», «Зи фикирар ванцелди», «Поэмаяр», «ЦIийи дастанар», «Махар» разделриз пайнава. Шииррин чIехи пай автордин уьмуьрдихъ, вилериз акур крарихъ, вакъиайрихъ, гьалтай инсанрихъ, абурун амалрихъ, къилихрихъ  галаз алакъалубур я.

«Пуд гада» поэма игитриз, «Кьве лацу къугь» поэма тIебиатдин сирериз бахшнава. «Къавур тIуьр сехитIви» поэмада нефсинин къативили инсан квел гъидатIа, гьадакай ихтилатзава.

Абад Азадов