Са шумуд югъ идалай вилик Россиядин ФСИН-дин Да­гъустанда­ авай Управленида уьлкведин ФСИН-дин рекьяй­ вузар акьал­тIарнавай жегьил пешекарар республикадин уго­лов­но-ис­пол­нительный къурулушдин идарайра кIва­лахрал тайинарна.

Шад мярекатда региондин УФСИН-дин регьбер, къенепатан къуллугъдин полковник Сергей Ролдугина, адан заместителри, Управленидин аппаратдин къуллугърин ва отделрин векилри иштиракна. Идарадин регьберди жегьил пешекаррин тIварцIихъ чими келимаяр лагьана, абуру чпел ихтибарнавай везифаяр намуслудаказ ва яргъал йисара къуллугъда арадал атанвай хъсан адетрал амал авуналди кьилиз акъудунин умудлувал къалурна.

— Къенин юкъуз куь вилик пешекарвилин цIийи майда­нар­ ачух жезва. Къейд ийиз кIанзава хьи, уголовно-испол­ни­тельный къурулушда кIвалахди неинки дерин чирвилер, виниз тир пешекарвал, гьакI марифатдин, эдебдин виниз тир ерияр, дуьзвал, намуслувал, принципрал кIевивал ва пешедиз­ вафалу­вал истемишзава. Россиядин ФСИН-дин вузра къачунвай чирвилерикай куьне куь кIвалахда менфят къачун, идалди уголовно-исполнительный къурулуш вилик тухуник куь лайих­лу пай кутун герек я. Россиядин Федерациядин уголовно-исполнительный къурулушдин къуллугъчидин виниз тир тIвар намуслудаказ хуьх! — къейдна С. Ролдугина.

Жегьил пешекарриз уьмуьрда лишанлу югъ тебрик авунин чими келимаяр, гьакI УИС-дин идарайра кIвалахдикай, пешекарвилин рекьяй виликди финин мумкинвилерикай Дагъустандин УФСИН-дин регьбердин заместителрини лагьана.

Шад мярекатдилай кьулухъ жегьил пешекарар чпин цIийи коллективрихъ галаз таниш хьана. Тежрибалу насигьатчийрин гъилик абур чпин кIвалахдин везифайрив эгечIда.

Къейд ийин хьи, цIинин йисуз Россиядин ФСИН-дин вузар дагъустанви 13 жегьилди  акьалтIарна. Жегьил лейтенантри рес­публикадин уголовно-исполнительный къурулушда, яни дуьз рекьел хкидай идарайра, силисдин изоляторра ва маса подразделенийра кIвалахда.

Рагнеда Рамалданова