Гьар са несилдиз вичин вахтунда Ватан хуьник, аваданламишуник пай кутазвай, чилел гел тазвай кьегьал рухваяр ава. Абур рикIел хуьн, гуьмбетар эцигун, чпин чешнейралди цIийи несилар тербияламишун важиблу я. Пара рекьерай бажарагъ авай Идрис Шамхаловни гьахьтин кас хьана. Кутугай буй-бухах, руьгь-суй авай ам хъсан драматургни, режиссёрни, актёрни, устIарни, пагьливанни, кьасабчини, багъманчини тир. Амма адан виридалайни зурба агалкьун лезги халкьдин театрдин бине эцигун я.
1-июлдиз Ахцегьа РДК-дин дараматдин (1927-1929-йисара Самур округдин исполкомдин председатель Гь. Сафаралиеван регьбервилик кваз мелерин къайдада театр патал эцигай, 400 кас ацукьдай чкаяр авай и гьайбатлу дараматди къени районэгьлийриз къуллугъзава) вилик Идрис Шамхаловаз — Дагъустанда сифте яз халкьдин милли театр бинеламишай кьегьал хциз — вижевай гуьмбет ачухна.
Шадвилин мярекатда Ахцегь райондин кьил Абдул-Керим Палчаева, гуьмбетдин автор, скульптор, РФ-дин лайихлу художник Шариф Шагьмарданова, Ахцегьрин музейдин директор Агьмед Дагъларова, «ЦIийи дуьнья» газетдин кьилин редактор Дашдемир Шерифалиева, Идрис Шамхалован мукьва-кьилийри ва гзаф масабуру иштиракна.
— Ахцегьвияр Дагъустанда илимдинни искуccтводин ва яшайишдин пара хилерай сифтебур хьайи бажарагъралди тафаватлу я. Гзафбур чна, гьайиф хьи, рикIелай ракъурнава. И гъалатI туькIуьр хъувуниз ва Идрис Шамхалов хьтин ксарин чешнейралди акьалтзавай несил тербияламишуниз чун мажбур я. Идрис Шамхаловаз гуьмбет эцигуналди, чна гьадахъ галаз санал лезги халкьдин театр арадал гъайи культурадин гьевескар чи вири устадрин къаматар эбеди ийизва… — къейдна райондин регьберди.
Мярекатдин иштиракчийри лезгийрин сифте драматург ва режиссёр рикIел хкунин ва адаз гуьмбет эцигун тебрикунин гафар рахана. Идрис Шамхалован багърийри райондин кьил Абдул-Керим Палчаеваз, скульптор Шариф Шагьмардановаз ва мярекатдин вири иштиракчийриз сагърай лагьана.
ЦIи Лезги театрдин — 120 (лезги драмкружокар 1905-йисуз Бакудин Сураханда ва 1906-йисуз Ахцегьа тешкилна) ва Идрис Шамхалов рагьметдиз фейидалай инихъ 80 йис тамам жезва. Адакай гегьенш материал чна газетдин къведай нумрада гуда.
Даш Алиев
