Эхиримжи йисара адет хьанвайвал, тахминан 200 касди иштиракай субботник кьиле фена и йикъара Мегьарамдхуьруьн райондин мулкунал алай Самурдин тамун ва Каспий гьуьлуьн къерехда. Мярекат Мегьарамдхуьруьн райондин администрациядин ва РД-дин тамарин майишатдин Комитетдин куьмекдалди «Леки» фондуни тешкилнавай.
«Чилин ва чIалан михьивал хуьх!» фикирдал алаз тешкилнавай ва вичикай виликамаз хабар ганвай серенжемда иштиракиз кIанзавай ксар (патарив гвай хуьрерин агьалияр, и хуьрерин мектебра кIелзавай аялар, муаллимар, паталай атанвай гуьгьуьллубур, мугьманар, тамухъанар, идарайрин пешекарар ва икI мад) райондин Билбилхуьруьн-Къазмайрин патав гвай (Самурдин тамуз гьахьзавай чкадал алай) милли паркунин визит-центрадал кIватI хьана.Инал къейд ийин хьи, серенжемда гьакIни Дербент шегьердин ва райондин Хизандин МФЦ-ди къуллугъзавай 15 аялди иштиракна.
Къалин ва гегьенш тамун мулкара хатасуздаказ къекъуьнин къайдайрин гъавурда тунвай, зирзибил кIватIунин жигьетдай пешекарри тагькимарнавай иштиракчияр, дестейриз пай хьана, тамай гьуьлуьн къерех галайвал рекье гьатна. Ана абур гьуьлуьн къерехда авай Приморский хуьруьн патав гвай кьере санал кIватI хьана.
Тешкилатчийри хабар гузвайвал, михьивал хуьнихъ элкъуьрнавай серенжемдин нетижада тамун ва гьуьлуьн къерехдин гегьенш мулкарай кьве самосвалда гьакьдай кьван зирзибил кIватIна ва тухвана.
Нетижалудаказ кIвалахайдалай кьулухъ серенжемдин иштиракчияр патал гьазурнавай милли жуьре акъажунрай, кьезил атлетикадай ва цIил ялунай спортдин программа башламишна. Гуьгъуьнлай фондунин активистри иштиракчияр патал дадлу тIуьнар тешкилна, абуру тIебиатдал гьазурнавай аш дадмишна. Аялриз лагьайтIа, тешкилатчийри мектебра кIелдайла герек къведай шейэрин наборар багъишна.
«Чаз и серенжемда иштиракай, и дуьнья авайдалай хъсанаруник, тIебиатдин надир ирс чун ва къвезмай несилар патал хуьник пай кутазвай вирибуруз сагърай лугьуз кIанзава», — къейдна субботникдин тешкилатчийри.
Саида Мурадова
