Миграгърин акъажунар

Дагъустандин Конституциядин йикъан вилик­ До­къузпара райондин Миграгърин хуьре спорт­дин милли жуьрейрай ва балкIанраллаз ча­ма­рар авунай акъажунар кьиле фена.

Мярекатда республикадин путар хкажунин спортдин федерациядин регьбер Магелан Саидова, хуьруьн администрациядин кьил Акиф Демирова, спонсорри ва масабуру иштиракна.

Докъузпара райондин иер тIебиатдин къужахда тешкилай акъажунар спортдин халис сува­риз эл­къвена. РикIе гъалиб жедай къаст авай гьар са иштиракчиди, чпин вири къуватар желбна, хъсан дережадин устадвал, алакьунар къалурна. Бал­кIан­раллаз ча­марар авун тамашачийри иллаки хушдиз кьабулна.

Акъажунрин гъалибчийриз медалар, дипломар ва пулдин пишкешар гана.

Магелан Саидова къейд авурвал, ихьтин турни­рар тешкилунихъ спортдин милли жуьреяр машгьур авунин ва вилик тухунин жигьетдай еке важиб­лувал ава. Идалай гъейри, ихьтин акъажунри жегьилриз чпин алакьунар къалурдай ва сагълам уьмуьр­ таблигъ ийидай мумкинвал гузва.

Акиф Демирова акъажунра иштиракай вирибуруз сагърай лагьана ва спортдин рекьяй тухузвай гьар са мярекатдихъ вири жемят патал хийир авайди къейдна.

1:1 гьисабдалди

27-июлдиз Россиядин премьер-лигадин 2-турдин сергьятра аваз Махачкъаладин «Динамо» ва «Оренбург» командайрин арада матч кьиле фена. Гуьруьш 1:1 гьисабдалди акьалтIна.

Къугъунин 49-декьикьада «Оренбургдин» ва­ра­риз Могьаммаджавад Хоссейннежада туп яна. 79-де­кьикьада Максим Савельева гьисаб барабарди авуна.

РикIел хкин, 1-турда «Динамо» 1:0 гьисабдалди­ «Спартак» командадиз кумукьнай. «Оренбург» командади лагьайтIа, премьер-лигадин сергьятра аваз кьиле тухвай кьве матчни сад хьтин гьисаб­ралди акьалтIарна.

Алай вахтунда турнирдин таблицада Махачкъаладин «Динамо» 12-чкадал ала. Нубатдин матч чи командади 3-августдиз «Ахмат» командадихъ галаз «Анжи Аренадал» кьиле тухуда.

Шад гьалара

Алатай гьафтеда Кьасумхуьрел шад гьалара грэп­плингдай Европадин кIвен­кIве­чивал патал кьиле фейи акъажунра 1-чка кьур Ибрамхалил Юсу­фоваз ва Дагъустандин кIвенкIвечивилин турнирда 2-чкадиз лайихлу хьайи Рустам Агъа­ра­­­гьимоваз къазанмишнавай агалкьунар муба­рак авуниз талукьарнавай мярекат кьиле фена.

Гуьруьшда СтIал Сулейманан райондин администрациядин спортдин, туризмдин ва жегьилрин крарин рекьяй комитетдин директор Чингиз Абдулмежидовани спортсменрин тренер Мансур Асварова иштиракна.

Вичин рахунра Ч. Абдулмежидова гъалибчийриз агалкьунар мубаракна ва идалай кьулухъ мадни чIехи кукIушар муь­тIуь­гъардай къастар хьун алхишна. Ада гьакIни абурув райондин администрациядин патай разивилин чарар, меценатдин патайни пулдин пишкешар вахкана.

Агьмед Магьмудов