И йикъара Махачкъалада авай «Лотос» чапханада «Лезги чIаланни урус чIалан шикилар галай гафарган» чапдай акъатна. Аялар патал акъуднавай и гафарганда гьатнавай гафар са шумуд кIватIалдиз пайнава: инсанар, гьайванар, набататар, улакьар, дин, спорт, недай затIар, хъвадай затIар, гьар йикъан уьмуьр ва мсб. Чи художникар тир Фуад Саидагьмедова, Эльвира Шихкеримовади ва Эльдар Вагьабова чIугунвай иер шикилри гафар рикIел хуьниз куьмекда.
Ктаб «Лезги газетдин» редакцияди арадал гъанвай «Хайи чIал хуьн» проектдин сергьятра аваз акъатнава. Идалай вилик «100 тапшуругъ» ва «Лезги чIал чирин» ктабар акъатнай. (Проект газетдин кьилин редактор Мегьамед Ибрагьимовани адан заместитель Куругъли Ферзалиева кьилиз акъудзава).
112 чиникай ибарат и ктаб мектебда кIелдай яшдив агакь тавунвай аялар патални, сифтегьан классра кIелзавайбур патални хайи чIалан гафарин алемдиз итижлу сиягьат ийидай хъсан куьмекчи я.
КIанзавайбурувай цIийи гафарган «Лезги газетдин» редакциядай 350 манатдай маса къачуз жеда. Алакъадин нумраяр: 8928-560-26-17 (ватсап); 8928-584-16-72.
С. Салимов
