Дяведин махсус серенжем кьиле тухузвай Россиядин армиядин кьушунри анжах виликди гьерекатзава. Эхиримжи кьве гьафтеда абуру Донецкдин Республикадин, Харьковдин, Сумдин, Запорожьедин областрик акатзавай цIудалай виниз хуьрер бандерачийрикай азаднава. Фронтдин вири сергьятар тирвал къизгъин женгер кьиле физва. Анра чи ватанэгьлийри еке жуьрэтлувал, викIегьвал къалурзава. Ахьтинбурукай садни гвардиядин капитан, ЦIийи Макьарин хуьряй тир Керимов Керим я.
Керим 1988-йисан 19-апрелдиз инженердин ва муаллимдин хизанда дидедиз хьана. Гимишдин медаль къачуналди, ЦIийи Макьарин юкьван школа куьтягьай, жаван 2006-йисуз ам А. Серован тIварунихъ галай Краснодардин военный летчикрин кьилин училищедик экечIна. Пуд лагьай курс куьтягьайла, жегьил Ейск шегьердин В. Комарован тIварунихъ галай авиациядин училищедиз фена ва ана кIелунар, летчикдин, алай аямдин самолетар чирунин рекьяй вердишвилер къачун давамарна.
КIелунар агалкьунралди акьалтIарай лейтенант РагъэкъечIдай патан военный округдиз истребительный авиациядин штурмандин къуллугъдал рекье туна. ЦIийи самолетар ахтармишунин, абурун мумкинвилер чирунин, тежрибалу летчикривай вердишвилер къачунин, лазим маса крарай кьил акъудунин карда Керимова зайифвилериз рехъ ганач. Командиррин патай анжах хъсан гафар, къиметар къазанмишна.
2019-йисуз капитанвилин чин гайи офицер самолетар женгина идара ийидай центрадин дестедин начальниквиле тайинарна. Ада Россиядин кьушунрихъ галаз Сирияда кьиле фейи гьерекатрани иштиракна. Адаз, тарифлу къуллугъ бинеда кьуна, «Сирияда кьиле тухвай серенжемдин иштиракчи», «Женгинин къуллугъда тафаватлу хьунай» 2 ва 3 лагьай дережадин, «Дальний Востокда дирибашвилелди къуллугъ авунай» медалар гана.
2022-йисуз дяведин махсус серенжемдив эгечIайла, Керим Керимова Россиядин армиядин бязи кьушунрик кваз Белоруссияда «Союзная решимость — 2022» ученийра иштиракзавай. Ада авиациядин дестеяр ВДВ-дин десантникринни штурмовикрин кьилдин бригададихъ галаз алакъалу авунин кIвалах тешкилзавай. 24-февралдиз абурун дестеди Антонован аэродром хуьнин женгина иштиракна. Абур йифиз вертолетра аваз фена ва хирер хьайибур саламат чкадиз ахкъудна. Юкъуз летчикри, десантникри аэродром кьаз кIанзавай Украинадин цIийи фашистар къирмишна. Нацистрикай Гостомель шегьер, ЛНР-дин ва ДНР-дин хуьрер азадзавай женгера иштиракна ва гьужумдиз физвай чи кьушунриз куьмекна.
Идалай гуьгъуьниз авиациядин частуниз Херсондин областда женг чIугвазвай чи кьушунриз куьмек гунин тапшуругъ гана. Душмандин кьушунри виликди гьужум ийиз 3 югъ тир. 8 километрдиз яргъи хьанвай фронтдин майданда капитан Керимова корректировка ийизвай Россиядин летчикри душмандин вад сеферда артух къуватриз еке зиянар гана. 10 танк, 5 ББМ ва 80 нацист тергна. 2023-йисуз Керим Керимова гвардиядин 37-мотострелковый бригададихъ галаз ДНР-дин Урожайная хуьр душмандин гьужумдикай хуьзвай женгина иштиракна.
2024-йисуз капитан акатзавай гвардиядин гьуьлерин пияда 155-бригада Курскдин областдиз рекье туна. Бандерачийри кьунвай областдин хуьрер, чилер цIийи фашистрикай азад авур женгер лап къизгъинбур хьана. Керимова са чIавузни усалвал, зайифвал къалурнач, инсафсузвилин а кьил авачир, инсанвал квадарнавай алчахар кукIварна, областдин мулкар азадна. Къалурай викIегьвилерай Керимоваз «Жуьрэтлувиляй» кьве орден, «Аскервилин дирибашвиляй» 2-дережадин медаль гана. Кьуд веледдин бубади алай вахтундани Ватандин вилик вичин буржи къагьриманвилелди тамамарзава, летчикрихъ, десантникрихъ, штурмовикрихъ галаз Донбассдин чилер миллетчийрикай азадзава, фашистар ва абуруз куьмек гузвай наемникар сергьятрилай анихъ катарзава.
Уьмуьрдин юлдашди, веледри ам гъалиб хьана хтун гуьзлемишзава.
Нариман Ибрагьимов
