ДатIана лугьузвай гафар я: угъривилин, лутувилин эхир сад я — жаза, дустагъ. Гьайиф хьи, бязи ксари и гафар рикIелай ракъурзава ва чпиз тахсиркарвилер гьалал жедайди хьиз ава. Каспийск шегьердин эменнидин алакъайрин управленидин виликан начальникди, вичин къуллугъдикай менфят къачуна, лутувилиз рехъ ачухна.
2021-2022-йисара ада Каспийск шегьердин агьали тир са дишегьлидивай чилин участок къакъудун кьетIна. А дишегьли шегьердин администрациядиз эменнидин алакъайрин управленидиз фена ва муниципальный хсусият тир водонапорный насосдин станция алай участокдин эвезда вичиз маса участок чара авун тIалабна. Винидихъ тIвар кьунвай управленидин начальникди дишегьлидихъ галаз участок маса къачунин гьакъиндай тапан, къалп икьрар кутIунна. Ахпа ада законсузвилелди чилин гьа участок вичиз маса къачуна. Гежел тевгьена, ада чилин и участок маса касдиз 10 миллион манатдай маса хгана. Гьа идалди дишегьлидиз 7,1 миллион манатдин зиян гана.
Гуьгъуьнлай ада муниципалитетдин игьтияжриз герек атана лугьуз, гуя дишегьлидин чилин участок маса къачуна лагьана, адаз чилин маса участок чара авунин гьакъиндай шегьердин администрациядин къарар акъудна. Законсуз ихьтин гьерекатралди, эменнидин алакъайрин управленидин начальникди «Каспийск шегьер» округдин администрациядин ихтиярда авай чил дишегьлидин кIвачихъ яна, муниципалитетдиз 5 миллион манатдин зиян гана.
Идан гьакъиндай уголовный дело прокуратуради Каспийск шегьердин суддиз рекье тунва.
* * *
Чарадан гьисабдай девлетлу жез кIанзавайбур мадни ава. Къайдаяр хуьдай ва силисдин органри гзаф кьадар пуларин иесивал авуниз талукь лутувилин тахсиркарвал дуьздал акъудна.
Тайинарнавайвал, кьилдин кархана хьиз регистрация авунвай лежбервилинни фермервилин майишатдин иесиди Дагъустандин хуьруьн майишатдин ва суьрсетдин министерстводиз фермервилин кардив эгечIзавайбуруз куьмек гунин программадай грант къачун патал къалп документар ракъурна.
Гьа и документрин бинедаллаз министерстводихъ галаз субсидия гунин гьакъиндай икьрар кутIунна. Лежбервилинни фермервилин майишатдин счетдиз 2 миллионни 800 агъзур манат яна. Пул гъилиз атанмазди, фермерди ам тайин рекьиз ваъ, вичин хсуси игьтияжриз ишлемишна, яни гьукуматдин пул чуьнуьхна. Министерстводизни хейлин зиян гана. Алай вахтунда силисдин кIвалахар тухузва ва тахсиркарвал субутдай вири делилар, фермердиз куьмек гайи къуллугъчияр тайинарзава.
* * *
Дагъустан Республикадин прокуратуради Россельхознадзордин региондин управленидин виликан регьбер ва кьилин пешекар тахсирлу авуна, абурулай къарагъарнавай уголовный дело суддиз рекье тунва. Абуру чпин къуллугъдикай чIурукIа менфят къачуна ва лутувилиз кьил яна.
Малумарнавай тахсирдай аквазвайвал, Россельхознадзордин Дагъустандин управленидин регьберди 2020-2024-йисара управленидин кьилин пешекар кIвалахдал текъвезвай чIал, ада вичин къуллугъдин везифаяр тамамар тийизвайди ва вичин гъилик квай пешекарриз законсуз тапшуругъар гузвайди чиз-чиз, ихьтин татугайвилерин вилик пад кьунач.
Нетижада кьилин пешекардиз и йисара законсузвилелди 1,7 миллион манат мажиб гана. Месэладай кьил акъудун патал уголовный дело Махачкъала шегьердин Советский райондин суддиз рекье тунва.
Хийир Эмиров
