Махачкъала шегьердин Гъепцегьрин­ куьчеда кьилел атай бедбахтвилин дуьшуьшдин гьалар арадай акъудунин месэладиз талукьарна, Дагъус­тандин Гьукуматдин Председатель Аб­дулмуслим Абдулмуслимова совещание кьиле тухвана.

РикIел хкун лазим я хьи, алай йисан  25-мартдин экуьнахъ, сятдин 9 жез 20 декьикьа амайла, меркездин Гъепцегьрин куьчеда гзаф мертебайрин 14-нумрадин кIвалера, газ себеб яз, хъиткьинун арадал атана. Са шумуд кас больницадиз аватна. Бязибурал хирер хьана, патав гвай гзаф квартирайрин кIвалеризни зиянар гана.

Алатай кьуд вацра газ хъиткьинай кIвалерин хейлин агьалийри чпин къуватралди ганвай зиянар арадай акъуд­на. Абуруз муниципальный бюджетдин­ гьисабдайни пулдин куьмекар гана. КIе­ве гьатай инсанриз мергьяматлувилин «Умуд»  фондунини  куьмекдин гъил яргъи авуна. Абдулмуслимован гафаралди, газ хъиткьинай кIвалера яшамиш жезвай бязи агьалийри гилани чпиз куьмек гунин патахъай арзаяр гузва.

«Куь фикир са кардал желб ийиз­ кIанзава, а кIвалера чи ватанэгьлияр яшамиш жезва. Къе-пака зул, ахпа кьуьд­ни алукьда. Хсуси эменнидин гьакъиндай­ни са бязи суалар арадал къвезва. Агьалийри чпин ихтиярар закондин бинедаллаз хуьзвайди гьиссна кIанда. Вири органри чпин гьерекатар, законрал амал авуна, тамамарун лазим я», — лагьана РД-дин Гьукуматдин Председателди. Ада мадни агьалийрин хатасузвал хуьниз кьилин фикир гана кIанзавайди  къейдна.

Дагъустандин премьер-министрди ха­бар гайивал,  РД-дин эцигунрин, архи­тектурадин министерстводи  ва ЖКХ-ди тешкилнавай сад тир дестеди хъиткьинун арадал атай куьчеда авай гзаф квартирайрин 8 кIвал ахтармишна, абуруз хьанвай зиянрин кьадар тайинарна.

Кьиле тухвай ахтармишунрин гьа­къин­дай гегьенш суьгьбет эцигунрин ва архитектурадин министр Бахтияр Уллаева авуна. Агьалийри агакьарнавай талукь документрин бинедаллаз ва Махачкъала шегьердин къарардалди хъиткьинуни  арадал гъанвай зиянар квадарун патал шегьердин бюджетдай 19 хизандиз, сифтегьан куьмек яз, 810 агъзур манат чара авуна. ГьакIни 9 хизандиз мадни куьмек гун патал Махачкъала шегьердин администрациядин талукь управлениди 330 агъзур манатдин куьмек гунин гьакъиндай документар гьазурзава.

Винидихъ гъанвай дуьшуьшриз ух­шарбур тахьун ва вилик пад кьун патал газдин рекьяй къуллугъчийри, Махачкъала шегьердин администрацияди, РД-дин Госжилинспекцияди  ва РД-дин энергетикадинни тарифрин министерстводи Гъепцегьрин куьчеда авай гзаф квартирайрин са шумуд кIвал мадни ахтармишнава. Гьар са кIвализ физ, газдин тадаракар ишлемишзавай гьалдизни фикир гана. Малум хьайивал, агьалийри са бязи шулугъриз рехъ гузвай. Вентиляция­дин каналар агалнавай, къенепатан кIва­лера дегишвилер тунвай. Газдин турбаяр полдин кIаникай тухванвай. Газдин къуллугъчийрихъ галаз меслят тавуна, газдин турбаяр тухванвай чкаярни дегишарнавай.

И чIуру гьалар арадай акъудун патал «Газпром межрегионгаз Махачкала» ООО-ди са жерге серенжемар кьабулнава. И идарадин генеральный директордин заместитель Имальдин Гусебован гафаралди, государстводин яшайишдин­ инспекциядихъ галаз санал кIвалера агьа­лийри газдин тадаракар ишлемишзавай къайдадал гуьзчивалзава ва герек ахтармишунарни кьиле тухузва.

«Агьалияр газдихъ галаз алакъалу месэлайрин гъавурда тун патал чна инсанрихъ галаз датIана таблигъатдин кIвалах тухузва. Чи гьар са къуллугъчи талукь са кIвалихъ галкIурнава ва абуру агьалийри газдин тадаракар ишлемишзавай гьалдал датIана гуьзчивал тухузва», — лагьана И. Гусебова.

Ада мадни алава хъувуна хьи, пешекарар гзаф квартирайрин кIвалер, техникадин вири истемишунрал ва нормативрал амална, газдин сетрик кутун патал герек вири кIвалахар комплекснидаказ тамамариз гьазур я.

Махачкъала шегьердин кьилин за­мес­титель Мавлидин Маликова лагьайвал, газ хъиткьинай кIвале пешекарри лифтинин тадаракар къайдадиз хкун патал кIвалах давамарзава.

Совещанида газ хъиткьинай кIва­ле­рин кьве агьалидини иштиракна ва абуру чпин фикирар лагьана.

Абдулмуслим Абдулмуслимова жавабдар ксарал газ ишлемишунин къайдайрал амал авунин патахъай датIана гуьзчивал тухун тапшурмишна.

Хийир  Эмиров