Россельхознадзордин Дагъустан Республикада авай управлениди къецепатан уьлквейрай чи региондиз гъайи гзаф кьадар майвайрикни емишрик азарар чукIурдай зиянкар гьашаратар квайди винел акъудна. Идакай «Лезги газетдиз» идарадин пресс-къуллугъди хабар гана.
Къейдзавайвал, 1-июлдилай 28-июлдалди майваяр вахтуналди хуьдай «Виадук» складда Россельхознадзордин пешекарри Ирандай, Туьркиядай, Азербайжандай ва маса уьлквейрай гъанвай емишрин, салан майвайрин 4 агъзурдалай виниз партияр (санлай къачурла, абурун умуми заланвал 70 агъзур тонндилай артух я) гуьзчивилик кутуна.
Карантиндинни фитосанитариядин жигьетдай ахтармишунар авурла, 247,7 тонн метягьрин кIуьд партиядик азар чукIурдай зиянкар гьашаратар квайди дуьздал акъатна: рагъакIидай патан (Калифорниядин) цуькведин трипс ва рагъэкъечIдай патан емишар недай квак.
ТIвар кьунвай зиянлу гьашаратар РФ-дин мулкара гегьеншдиз чукIунин вилик пад кьунин макьсаддалди абур квай метягьар тадиз фитосанитариядин рекьяй хатасуз авунин къарар кьабулна.
«Лезги газет»
