22-июлдиз РД-дин Гьукуматдин Председатель Абдулмуслим Абдулмуслимова Орелдин областдин губернатордин заместитель Александр Бирюковахъ галаз гуьруьш кьиле тухвана. Мярекатда республикадин вице-премьер Нариман Абдулмуталибовани иштиракна.
«Лезги газетдиз» региондин Гьукуматдин пресс-къуллугъди хабар гайивал, Александр Бирюков Дагъустандиз чкадин экономикадихъ авай мумкинвилерихъ галаз таниш хьун ва кьве регионди санал кьилиз акъуддай проектриз талукь месэлаяр веревирд авун патал мугьман хьанвай.
Гуьруьшдал Абдулмуслим Абдулмуслимова Александр Бирюковаз Дагъларин уьлкведин кьетIенвилерикай, экономикадин, хуьруьн майишатдин, туризмдин хилер вилик тухун патал кьабулзавай серенжемрикай суьгьбетна. Ада гьакIни республика, яшайишдин гьи хиле хьайитIани, кьве региондин игьтияжризни жаваб гузвай проектар кьилиз акъудиз, санал кIвалахиз гьазур тирди малумарна.
Орелдин областдин гьукумдин векилди Абдулмуслим Абдулмуслимовал губернатор Андрей Клычкован патай чими саламар агакьарна ва чIехи мугьманпересвиляй сагърай лагьана. Ада къейд авурвал, Дагъустан Орелдин область патал чаради туш, гьикI лагьайтIа, областда агъзурралди дагъустанвияр яшамиш жезва. А.Бирюкова Россиядин виридалайни кьиблепата авай региондихъ галаз амадагвилин алакъаяр мягькемарун Орелдин область патал важиблу месэла тирдакайни хабар гана.
Чи мухбир
