Кьиблепатан Дагъустандин районриз­ хъфизвай гзафбуруз малум кар я: иллаки гатун вахтунда Махачкъаладай Дербентдиз хъфизвай рекье, къадим­ шегьердив агакьдайла, гзаф улакьар­ авайвиляй рекьел пар акьалтзава, сад-садан гуьгъуьналлаз явашдиз гьал­завай улакь­рин цIиргъер арадал къвезва. И месэла гьялун патал рес­публикадин гьукумдин кьилевайбуру­ Дербентдилай элячIна фидай цIийи рехъ туькIуьрдай къарар кьабулна. Адан нетижада шегьре рекьел акьалтзавай пар хейлин кьезил жеда ва улакьар, са манийвални авачиз, шегьердилай элячIна фида.

ЦIийи рехъ туькIуьриз гатIунна са акьван вахт арадай фенач, кIвалахар вахту­налди акъвазаруниз мажбур хьана. И кар­дин себебни Зидьян-Къазмаяр хуьруьз­ мукь­ва мулкара, чил эгъуьндайла, жа­гъан­­вай археологиядин надир гуьмбетар я. Алай вахтунда ина пешекар археолог­ри илимдин рекьяй ахтармишунар кьиле тухузва.

Республикадин са жерге СМИ-рин малуматралди, жагъанвай экспонатрин яшар 5 агъзурдалай пара хьун мумкин я. И делилди Россиядин виридалайни къадим шегьер яз гьисабзавай Дербентдив агакьдалди авай мулкара 5 агъзур йис идалай вилик инсанар яшамиш хьайидан гьакъиндай шагьидвалзава. Тарихдин шагьидрин арада къванцин якIвар, техил регъведай алатар, хъенчIин къапар, чахмахдин къванцикай раснавай лежберрин алатар ва маса затIар ава. Абуру и мулкара лап дегь заманайра инсанар малдарвилел, чил гьялунал ва маса сеняткарвилерал машгъул хьайиди тестикьарзава.

Чи мухбир