Эхиримжи йисара Дагъус­тан­да хуьруьн майишатдин хел йигиндиз вилик­ физва. Уьлкведин дережадин чIе­хи проектрилай гатIунна (ми­­сал яз, СтIал Сулейманан районда­ кутунвай шуьмягърин багъ, Ахцегь районда авай ичерин багъ), кьилдин ксарин майи­шатрал къведалди — Да­гъус­танда багъманчивилин, са­лар­банвилин, хипе­хъанвилин, ­малдарвилин… хилер виликди физва.

Хуьруьн майишат вилик тухунин жигьетдай чи респуб­ли­када тIебиатдин къулай шар­тIарни ава. КIанзавайди чилел­ кIвалахдай ашкъи авай зегьметкешар я. Ахьтинбурни да­гъус­танвийрин арада тIимил авач.

Мисал яз, Ахцегь райондай тир Руслан Эфендиевахъ, Гумбет районэгьли Сурхай Галбацевахъ, Дахадаеван райондин агьали Камил Къурбановахъ, Ногъай райондай тир Мурат Ма­маевахъ (абур вири коммерциядинди тушир хуьруьн майишатдин са кооперативдин членар я) чпин хайи районрин мулкара багъманчивилин, хипехъанвилин, малдарвилин хилер вилик тухудай ниятар ава. Алай вахтунда абур чпин майи­шатар къанун-къайдадив кьадайвал ре­гистрация авунин месэлайрал­ машгъул я.

Гьелбетда, пулдин такьатар чара ийидай мумкинвал авай гьукуматдин, чкадин муниципалитетрин, жемиятдин тешкилат­рин куьмек галачиз абуруз гъиле кьазвай кар вилик тухуз четин жеда. Эгер тайин са районда хуьруьн майишатдин са хел вилик тухузвай СПК ва я КФХ кардик акатайтIа, адакай муниципалитетдин администрация­дизни хийир жеда (алава налогар къведай чешме я). Эхиримжи йисара гьам уьлкведа, гьамни регионра кьилдин ксариз яшайишдин жуьреба-жуьре хилера чпин проектар кьилиз акъу­дунин карда куьмек хьун патал махсус программаяр кьабулзава. Гьукуматдин патай пулдин такьатар чара ийизва. Ихьтин шартIара хсуси карчивал тухуз регьятни жеда.

Чна винидихъ тIварар кьунвайбуруз югъур хьурай лугьузва. Гьахьтин къастар авай инсанар чи районра, хуьрера гьикьван пара хьайитIа, гьакьван чи ерияр авадан жеда.

Мурад Мегьамедкеримован

«СтIал Сулейманан район: ­тарихдин гелерай» ктабдай