Алатай гьафтедин эхирра РД-дин информациядин ва печатдин Агентстводин регьбердин меслятчи Мурад Мегьамедкеримовни «Лезги газетдин» кьилин редактор, РФ-дин журналистрин союздин Дагъустанда авай отделенидин председатель Мегьамед Ибрагьимов «Лекьрен муг» этнолагердиз мугьман хьана.
Гатун вахтунда уьлкведин жуьреба-жуьре шегьеррай хайи хуьрериз хквезвай аялар патал кардик кутунвай ам Кьурагь райондин КIирийрин хуьре Россиядин Игит Зейнудин Батманован тIварцIихъ галай школа-интернатда ава.
Алай вахтунда лагерда чпин яшар 8-15 йисар тир 60-дав агакьна аялри ял язава. Гадаярни рушар кьилдин дестейриз пайнава. Абуруз ина хайи чIал, тарих, сеняткарвилер, балкIанар гьализ, чIемерукрай ягъиз чирзава, Кьиблепатан Дагъустандин тIебиатдин надир чкайриз сиягьатриз тухузва… Са гафуналди, лагерда девлетлу ва хъсан программа арадал гъанва.
Аялрихъ галаз кьиле фейи гуьруьшдал Мурад Мегьамедкеримова акьалтзавай несилдин векилриз хайи чIал, халкьдин тарих, адетар чируниз ва чIехибуруз яб гуниз эвер гана. Ада гьакIни лагердиз вичин патай къугъвадай тупар, скакалкаяр, ракеткаяр, ширинлухар пишкешна.
Вичин нубатда Мегьамед Ибрагьимова лагерда ял язавайбуруз республикада лезги чIалал акъатзавай газетрикай, журналрикай ихтилатна, аялриз хайи чIал чизвай гьалдиз къимет гана.
Эхирдай «Лекьрен муг» этнолагердин регьбер Садикь Гьасанова мугьманриз чпел кьил чIугунай сагърай лагьана ва абурухъ кIвалахда агалкьунар хьун алхишна.
Агьмед Магьмудов
