Дагъустанда цвадай ва храдай промышленностдин  хилек акатзавай карханаяр йигин еришралди вилик физва. Региондин промышленностдин ва алишверишдин министерстводин делилралди, 2024-йисуз республикадин парталар цвадай ва храдай карханайри, санлай            къачурла, 181,6 миллион манатдин къимет авай метягь гьазурна ва кIвалахар тамамарна. Им 2023-йисан нетижадилай 71 процентдин гзаф кьадар я. 2025-йисан январь-апрель варцара и делил 53,6 миллион манатдиз барабар хьана.

2024-йисуз и хиляй атанвай налогрин такьат­рин кьадарни 27,69 миллион манатдив агакьна (2023-йисуз — 18,27 миллион манат). Алай вахтунда  республикада парталар цвадай ва храдай промышленностдин 390  кархана гьисабдиз къачунва. Им алатай йисандалай 82-дан гзаф я.

И хиле виридалайни чIехибур тир «Лавантель», «Coro Home», месер гьазурдай «Магнат» фабрикади, «Interios» ва маса карханайри гьар йикъан ва кIвалахал алукIдай махсус парталар, месер ва маса шейэр цвазва.

И хилез государстводин патай куьмек РД-дин Гьукуматдин 2020-йисуз тестикьарай  «Промышленность виликди тухун ва адавай базарда гьуьжетиз хьунин алакьунар хкажун» программадин сергьятра аваз агакьарзава. Кьилди къачуртIа, субсидийрин куьмек, тадаракар ва машинар маса къачудайла хьайи харжийрин 50 процент эвез хъувуналди гузва. ИкI, 2021-2024-йисара цвадай промышленностдин тадаракар маса къачунин рекье  27,8 миллион манатдин субсидийрин  куьмек 6 карханадиз гана.

РикIел хкин, РД-дин Халкьдин Собранидиз кIелай­ Чарче Сергей Меликова промышленностдин про­изводство республикадин экономика вилик­ди тухун патал кар алай рекьерикай сад яз къейднай.

Амина Муслимова