Курхуьрелай тир зегьметчи Рамазанов Абдулакима тербиядин мярекатра лугьудай: сада — уьлкве абадни ийида, сада — барбатIни.
ЧIехи камалэгьли Ярагъ Мегьамед хьтин кас акъатнавай Ярагърин хуьруьн тIвар виринра сейли я. Ярагъ Мегьамедан насигьатрикай тарс хкудзавай бажарагълу ксари хуьр-кIвал, жемят патал аквадай хьтин мергьяматлу крар ийизва. ГъвечIибурни гьа ихьтин руьгьдаллаз тербияламишзава. Алай вахтунда гьахьтинбурун жергедай сад и хуьруьнви хьанвай, вичин тIвар хъсан краралди раижзавай, эсил Маллакентдай тир Мирзегьасанов Мурад я. Ам хуьруьнбурук акахьнава, хийир-шийирдин мярекатра иштиракзва. Мукьвара зун са дерди кар аваз и хуьруьз акъатна. Ина минеральный ятар акъудзавай завод кардик ква лагьайла, за гьанихъ ялна. Чир хьайивал, Мурада анин директорвал ийизва. Ада чаз, цехдай цехдиз тухуз анрин кIвалахрикай, шартIарикайни рабочийрикай ихтилатарна. Мурад гъавурда авай карчи я. Нихъ галаз гьикI рахадатIа, меслятдатIа, кьве патазни хийирлу икьрар гьикI кутIундатIа чизва. И чкада “Самур” тIвар алаз минеральный ва михьи, гьамга хьтин суьзмишнавай яд акъудзава. Ятар чкадал гьазурзавай 0,5, 0,75, 6 литрдин къапара цазва, махсус чкадал саламатзава. Яд ина виликрайни акъудзавайди тир. Гила са йис я Мурада а чкадин иесивал ийиз. ЦIийи автоматарни багьа тадаракар хкана, тайин чкайрал эхцигна, кардик кутунва. Ина 25-30 касдиз кIвалах хьанва. Абурук паталай къвезвайбурни ква. Цехра цIийивилер турдалай кьулухъ шартIарихъ галаз кьадайвал столовойни кардик кутунва.
Гьазур продукция чкадал яргъалди аламукьзавач. Виликамаз икьрар хьанвайвал, Москвадиз, Санкт Петербургдиз, Бакудиз, Махачкъаладиз рекье твазва. Хийир-шийирдин мярекатризни тухузва.
Исятда Волгограддинни Краснодардин заказар кьилиз акъудзава. Герек ятар лагьайтIа, Кьурагь дагъларин булахрай гъизва. И кар кьилиз акъудзавай тежрибалу шофер Шихабидов Исмаилаз вирида сагърай лугьузва. Йикъа ада 10-12 тонн яд гъизва. Мадни рабочияр тир Л.Масиловади, С.Мегьамедовади, М.Сарухановади, С.Кьасумхановади, оператор Н.Жабраилова, кьилин инженер Д.Мирзебегова ва масабуру сезондин вахтунда бегьерлувилелди кIвалахзава. Чими ятIани, цехра ва маса чкайрани кIвалахрин еришар зайифарнавач.
Заз гьазур продукциядин склад гегьеншариз, газдин цех эцигиз, лимонадарни акъудиз кIанзава, — лугьузва Мурад Салавудиновича. Харжияр инризни тIимил акъатдач, ятIани дурум гуда. Халкь, жуван ерияр патал ибур герек крар я.
Сагърай, къуй куь фикирда авай крар кьилиз акъатрай.
Райсудин Набиев
