Дагъустандин халкьдин писатель, алим Гьаким Къурбанан «Философия лезгинского народа» тIвар алай монографияда лезги халкьдин гьакъикъатдин, тIебиатдин, миллет санлай вилик финин гьакъиндай суалриз жавабар ава.
Лезгияр Кавказдин дибдин халкьарикай сад я. Лезгийрихъ чпин чIал, девлетлу меденият, халкьдин мецин яратмишунар, къадим тарих, чIехи бубайрилай агакьнавай адетар, къанажагъ ва метлеблу эдебият, иер манияр, кьуьлер, устадвал ава.
Гьаким Къурбана вичин монографияда, тайин мисалар гъиз, халкьдин философия веревирдзава. Мисаларни алимди халкьдин яшайишдай, диндай, тарихдай, эдебиятдайни медениятдай къачунва. КIелдайбуруз ктабдай лезги халкьдин эдебдинни ахлакьдин уьмуьрдикай, лезгийрин алай ва фейи вахтарин дуланажагъдикай, психологиядикай, руьгьдин ирсинин гъакъиндай авай чирвилер гегьеншарун патал хейлин материалар жагъида.
Ктаб алимриз, вузрин, училищейрин муаллимриз, студентриз ва гьакIни Кавказдин халкьарин философия чириз кIанзавайбуруз теклифиз жеда.
Лезгият Шагьпазова, ДГУ-дин магистрант
