Дагъустанда Россиядин Яракьлу къуватрин жергейра икьрардин бинедаллаз къуллугъдайбур кьабулун давам жезва.
Къейд ийин хьи, икьрардин бинедаллаз резервдин полкуник экечIзавайбуруз са сеферда гузвай пулдин кьадар 500 агъзур манатдин артухарнава.
Ахцегь райондин администрациядин телеграм-каналди хабар гузвайвал, икьрардин бинедаллаз къуллугъзавай муниципалитетдин агьалийривай санлай са сеферда 1 миллионни 900 агъзур манат пул къачуз жеда:
500 агъзур манат – Дагъустандин Гьукуматдин патай;
500 агъзур манат – Дагъустандин Гьукуматдин патай резервдин полкуник экечIзавайбуруз хгузвай алава пул;
400 агъзур манат – Россиядин оборонадин министерстводин патай;
200 агъзур манат – Ахцегь райондин администрациядин патай;
100 агъзур манат – бюджетдинбур тушир такьатрин гьисабдай.
РикIел хкин, икьрардин бинедаллаз уьлкведин Яракьлу къуватрин жергейра къуллугъзавайбуруз вацра 210 агъзур манат мажиб гузва.
Ахцегь райондин администрациядин пресс-къуллугъди хабар гузвайвал, 2025-йисан эвел кьилелай Ахцегь райондин 5 агьалиди Россиядин оборонадин министерстводихъ галаз икьрар кутIуннава.
РФ-дин Яракьлу къуватрин жергейра икьрардин бинедаллаз къуллугъ авунин гьакъиндай алава малуматар, телефондин 8-989-484-69-95 нумрадиз зенг авуна, чириз жеда.
Къейд ийин хьи, икьрардин бинедаллаз къуллугъзавайбур патал уьлкведа яшайишдин рекьяй са жерге кьезилвилер (льготы) кардик кутунва. Мисал яз, накопительно-ипотечный къурулушдин куьмекдалди РФ-дин оборонадин министерстводин такьатрин гьисабдай кIвалер маса къачун, военно-медицинский идарайра сагъламвал пулсуз мягькемар хъувун, 20 йисуз къуллугъ авурдалай кьулухъ кьезилвилер аваз (льготный) пенсия къачудай мумкинвал, дяведин гьерекатрин ветерандин дережа къачун, аялриз вузра бюджетдин чкаяр чара авун, аялри сагъламвал мягькемардай лагерра пулсуз ял ягъун ва масабур.
«Лезги газет»
