Украинада кьиле физвай махсус серенжемда иштиракзавай дагъустанвийрин арада чпин яшар 60 йисарилай алатнавайбур са акьван пара авач. Ахьтинбурукай сад бинеяр Кьурагь райондай тир, эхиримжи йисара Каспийск шегьерда яшамиш жезвай Къази Зугьрабов я.
Адан уьмуьрдин, кIвалахдин рекьерикай, алай вахтунда кьиле тухузвай къуллугъдикай «Лезги газетдин» алай йисан 12-нумрадиз акъатай Нариман Ибрагьимован макъалада гегьеншдиз суьгьбетнава.
Мукьвара Къази Зугьрабов куьруь отпускдин арада Каспийскдиз хтанвай. Шегьердин кьилин ктабханада жегьилрин ватанпересвилин Россиядин Игит Мегьамед Нурбагандован тIварцIихъ галай «Ватан» тIвар алай клубда адахъ галаз гуьруьш тешкилна. СВО-дин иштиракчиди мярекатдиз атанвайбуруз Ватан хуьн гьар садан эвелимжи буржи тирдакай, вичин къуллугъдикай, серенжем тухузвай чкада авай гьаларикай ихтилатна. Гуьруьшдин сергьятра аваз, Каспийск шегьердин администрациядин кьилин заместитель Гьуьсейн Ункилова Къази Зугьрабовав шегьердин мэр Борис Гонцован патай саламар агакьарна ва адав администрациядин патай Гьуьрметдин грамота вахкана.
Къази Зугьрабовахъ галаз мад са гуьруьш «Лезги газетдин» редакциядани кьиле фена. Адан сергьятра аваз, генерал-полковник М. Танкаеван тIварцIихъ галай фондунин председатель Гьасангьуьсейн Абдулжелилова СВО-дин иштиракчидив вафалувилелди Ватандиз къуллугъ авунай ва акьалтзавай несилриз ватанпересвилин тербия гуник лайихлу пай кутунай М. Танкаеван тIварцIихъ галай медаль вахкана.
Чи мухбир
