Украинада кьиле физвай махсус серенжемда иштиракзавайбурукай сад бине Мегьарамдхуьруьн райондай тир Ягьадин Куьребегов я. Мукьвара муниципалитетдин кьил Фарид Агьмедова адахъ галаз гуьруьш кьиле тухвана ва адавай къуллугъ кьиле физвай гьаларикай, дерди-баладикай хабарар кьуна.
«Махсус серенжемда иштиракзавайбурун, абурун хизанрин чалай аслу месэлаяр гьялиз чун гьазур я. И четин макъамда, Ватандин къуллугъда акъвазна, намуслувилелди ватанпересвилин буржи тамамарзавайбуруз алакьдай вири жуьредин куьмекар гун чи умуми буржи я», — къейдна райондин регьберди.
Гуьруьшдин сергьятра аваз, Фарид Агьмедова Ягьадин Куьребеговав, Украинада кьиле физвай махсус серенжемда къалурзавай викIегьвилер фикирда кьуна, Мегьарамдхуьруьн райондин администрациядин патай Гьуьрметдин грамота вахкана.
Чи мухбир
