24-июндиз Дагъустандин Кьил Сергей Меликова агломерация вилик тухунин рекьяй кардик квай советдин заседание кьиле тухвана. Анал веревирд авур асул месэлайрин арада, къанундал амал тавуна, тешкилзавай эцигунрин вилик пад кьун ва мулкар комплекснидаказ вилик тухудай проектриз къимет гун авай.
Республикадин регьберди къейд авурвал, къанунсуздаказ кьиле тухузвай эцигунри агломерация вилик финиз манийвал гузва ва агъзурралди дагъустанвияр патал четинвилер арадал гъизва.
«Чилин участокриз къанунсуздаказ документар туькIуьрунин нетижада акатай чкадал кьакьан гьавайрикай ибарат яшайишдин кIвалер пайда жезва ва абур гуьгъуьнлай, са къайда-низамни авачиз, коммунальный сетрик кутазва. Ихьтин гьалари гьатта дагъустанвийрин яшайишни хаталувилик кутазва. Мисал яз, алай йисан гатфарихъ Махачкъаладин Редукторный поселокда газдилай арадал атай хъиткьинун къалуриз жеда. Са кIвале арадал атай хъиткьинунин нетижада патарив гвай кIвалеризни еке зиянар хьана.
Кьакьан гьавайрикай ибарат кIвалер эцигдайла, агломерациядин кьетIенвилер, эцигунриз талукь къайдаяр вилив хуьзвач: я аялар къугъвадай майданар, я сейр ийидай махсус чкаяр, я сагъламвал сергьятламиш хьанвайбур патал къулай шартIар, рекьер — са затIни къайдадик кутазвач. Вири и истемишунар фикирда кьуна кьиле тухузвай эцигунрин мисалар аватIа гъваш куьне», — элкъвена ам заседанидин иштиракчийрихъ.
Республикадин Кьили мулкарикай, абур комплекснидаказ вилик тухун фикирда кьуна, менфят къачун герек тирди рикIел хкана.
Махачкъаладин агломерациядин сергьятра аваз, проектар ахтармишунин жигьетдай кьиле тухванвай кIвалахдикай РД-дин эцигунрин, архитектурадин ва ЖКХ-дин министр Бахтияр Уллаева хабар гана.
Адан гафаралди, Махачкъаладани Каспийскда акатайвал кьакьан гьавайрин кIвалер эцигунин вилик пад кьун патал мулкар комплекснидаказ вилик тухунин къайда кардик кутунва. Шегьеррин администрацияр гьар са проектдиз тайин алгоритмдал амална килигдайвал я.
«Месэладив ихьтин къайдада эгечIайла, инженерный, яшайишдин, транспортдин инфраструктура хъсандиз туькIуьрдай ва эцигунрин жигьетдай кардик квай вири истемишунар кьилиз акъуддай мумкинвал жезва. Къе чна заседанидал веревирд авун патал хъсан гележег авай са шумуд проектни теклифзава», — къейдна Бахтияр Уллаева.
Сергей Меликова, министрдин ихтилатриз баянар гудайла, алава хъувурвал, гьар са кIвалин патарив гвай мулкар авадан авун ва агьалияр патал яшайишдин къулай шартIар тешкилун чарасуз я. Ада гьакIни Дагъустандин образованидинни илимдин, спортдинни физический культурадин, культурадин министерствойрин кьилериз, яшайишдин метлеб авай объектар эцигдайла, абуру патарив гвай мулкара авай кьакьан гьавайрин кIвалер гьисаба кьуниз ва федеральный программайра иштиракуниз эвер гана.
Сергей Меликован фикирдалди, кар алай мад са месэла кьакьан гьавайрикай ибарат гьар кIвалерин патав зирзибил гадардай контейнерар эцигдай махсус майданар туькIуьрунихъ галаз алакъалу я. И делил ихтилат физвай жуьредин кIвалерин проектра чарасуз хьана кIанда.
РД-дин Гьукуматдин Председателдин сад лагьай заместитель Манвел Мажонца эцигунарзавай бязи карханайри технический рекьяй герек шартIар галачиз проектар теклифзавай дуьшуьшар гьалтзавайди къейдна.
«Эцигунардай ихтиярар къачун патал гьукумдин органдив агакьарзавай проектдихъ ам экспертизадай фенвайди тестикьарзавай документар жезва, амма технический рекьяй герек шартIар авач. Абурун чкадал са гьихьтин ятIани справка гилигзава. Къанундин чIалалди рахайтIа, технический рекьяй герек шартIар галачиз проект гьич веревирд авун патални теклифиз жедач. Винидихъ гъанвай хьтин дуьшуьшра лагьайтIа, абурухъ экспертрин заключениярни жезва. Асул гьисабдай ихьтин экспертизаяр кьилдин ксарин идарайри гузва», — лагьана сад лагьай вице-премьерди.
Сергей Меликова РД-дин эцигунрин, архитектурадин ва ЖКХ-дин, юстициядин министерствойрин кьилериз лицензияр гудай ихтиярар авай кьилдин ксарин идарайрин гьакъиндай ахтармишунар тешкилун буйругъна. Кимивилер винел акъудай дуьшуьшра материалар къанун-къайда хуьдай органрал агакьарун тапшурмишна.
«Абур халис лутуяр я. ГьикI абуру пулдихъ набут тирди тестикьарзавай справкаяр гузватIа, гьакI ихьтин справкаярни маса гузва», — къейдна республикадин Кьили.
Гегьеншдиз РД-дин Кьилин сайтдай кIелиз жеда.
Агьмед Магьмудов
