24-июндиз Сергей Меликова Махачкъалада терроризмдиз акси комиссиядин заседание кьиле тухвана. Идакай «Лезги газетдиз» РД-дин Кьилин пресс-къуллугъди хабар гана.
Республикадин регьберди алай вахтунда дуьньядин жуьреба-жуьре уьлквейра арадал атанвай муракаб гьалара миллетрин, гьар жуьредин динрин векилрин арада гъулгъула тваз кIанзавай къуватар авайди къейдна. И делил фикирда кьуна, терроризмдиз аксивалунин рекье региондин гьукумдин вири органри санал кIвалахун герек я.
Комиссиядин заседанидал гьакIни шегьре, ракьун рекьерал, авиациядин, гьуьлуьн инфраструктурайрал хатасузвал таъминарунин месэлани веревирдна. Сергей Меликован гафаралди, и объектрихъ санлай вири уьлкве патал еке важиблувал ава, гьавиляй абур кьетIен гуьзчивилик хьун герек я.
Заседанидин кIвалахда РД-дин Гьукуматдин, республикадин къанун-къайда хуьдай органрин, са жерге министерствойринни ведомствойрин векилри иштиракна.
«Лезги газет»
