Мегьарамдхуьруьн райондин сайтда хабар ганвайвал, алай йисан 24-апрелдиз Мегьарамдхуьре футболдин “Анжи” клубдин Академиядин филиал ачухна.
“Леки” стадиондал кьиле фейи мярекатда райондин кьил Фарид Агьмедова, Махачкъаладай атанвай “Анжи” клубдин ва чкадин “Леки” командадин векилри, райадминистрациядин жавабдар къуллугъчийри, райондин тешкилатрин ва са жерге идарайрин кьиле авай ксари, жегьилри иштиракна. Мярекат райадминистрациядин физический культурадин ва спортдин, гьакIни культурадин отделрин куьмекни галаз тешкилнавай.
Шад мярекат ачухай Фарид Агьмедова къенин юкъуз сагълам уьмуьр пропаганда авунихъ еке метлеб авайди, идахъ галаз сад хьиз, “Анжи” Академиядин филиал ачухуни районда спорт вилик тухуниз, спортдин машгьур ва виридан рикI алай жуьрейрикай сад тир футболди жаванриз сагълам беденда сагълам руьгь хьуниз куьмекдайди къейдна.
Гуьгъуьнлай мярекатдал рахай футболдин “Анжи” клубдин генеральный директордин заместитель Рамазан Гъазиева ва “Анжи” Академиядин директор Мегьамед Исаева футболди Дагъларин уьлкведин спортдин уьмуьрда еке чка кьун, футболиствилин пешени анжах са футбол къугъвадай майдандин сергьятралди акьалтI тавун лазим тирди алава хъувуна.
— Футболистри яшайишдин рекьяй проектра, мергьяматлувилин серенжемра иштиракна кIанда, вучиз лагьайтIа Дагъустанда спортдиз гьамиша фикир гузва, спортсменар лагьайтIа, амайбуруз чешне хьун герек я. Мегьарамдхуьруьн район Кьиблепатан Дагъустанда спорт пара активнидаказ вилик тухузвай майдан я. Идалайни гъейри, Мегьарамдхуьруьн футболдин “Леки” команда Дагъустандин чемпионвилин тIварцIиз ва СКФО-дин Кубокдизни лайихлу хьана. И агалкьунри ина футбол вилик тухудай вири къулайвилер авайдан жигьетдай шагьидвалзава, — къейдна абуру.
Филиал ачухдайла яру лент атIун Фарид Агьмедовал, атанвай мугьманрал — Рамазан Гъазиевал ва Мегьамед Исаевал ихтибарна.
Мярекат манидарринни кьуьлердайбурун иштираквал авай концертдин программади давамарна. И пай акьалтIайла стадиондал Мегьарамдхуьруьн “Леки” ва Хасавюртдин “Даймохк” командаяр къугъвана, 7:0 гьисабдалди “Леки” командади гъалибвал къазанмишна.
Рагнеда Рамалданова
