Алирза Саидов. Лезгийрин машгьур шаир. Ада 1959-йисуз Москвада литературадин М.Горькийдин тIварунихъ галай институт акьалтIарна. Гьа и йисуз шаирдин урус чIалаз авунвай таржумайрикай ибарат «Вахъ галаз, Самур» ва лезги чIалал кхьенвай шииррин «Самурдин авазар» тIварар алай ктабар чапдай акъатна. Гуьгъуьнлай адан къелемдикай мадни ктабар хкатна: сад-садал итижлу, манна-метлебдиз дерин, кIелзавайбуру хушдиз кьабулай.

Алирза Саидов лезги литературадин тарихда кьетIен гел, рехъ тунвай шаир я. 26-апрелдиз Махачкъалада Р.Гьамзатован тIварунихъ галай милли ктабханада шаирдин 85 йисан юбилейдихъ галаз алакъалу яз кьиле фейи шииратдин межлисди и делил мад сеферда субутна. Мярекатдин тешкилатчи Кьиблепатан Дагъустандин жегьилрин Союз тир.

Межлис ДГУ-дин студент, жегьил шаир Владик Батманова кьиле тухвана. Мярекат ачухдайла Кьиблепатан Дагъустандин жегьилрин Союздин руководитель Равидин Абдурагьимова кIватI хьанвайбуруз сагърай лагьана ва Алирза Саидован литературадин ирсинин гужлувиликай суьгьбетна.
Бажарагълу шаирдикай чпин фикирар гьакIни ДГУ-дин профессор Гьажи Гашарова, «Лезги газетдин» литературадин отделдин редактор Мердали Жалилова, лезги чIаланни литературадин муаллим Фахрудин Насрединова, филологиядин илимрин доктор Гьаким Къурбана, шаирдин руш Эминат Алирзаевнади ва хейлин масабуру раижна.

Къейд ийин хьи, шииратдин межлис Тамила Хидировади тамамарай манийри, Марсель Ризаева – чIагъандал, Сулейман Сулейманова далдамдал къугъвай макьамри, шегьердин 39-нумрадин лицейда кIелзавай аялри кIелай шиирри мадни гурлу авуна.

Алирза Саидован 85 йисан юбилейдихъ галаз алакъалу яз ктабханадин къуллугъчи Секинат Мусаевади фикир желбдай выставкани тешкилнавай.

«Лезги газет»