РФ-дин мулкунал женгинин гьерекатра иштиракзавайбурун аялриз гила вузра бюджетдин чкайрал кIелдай мумкинвал ганва. Президент Владимир Путина къул чIугунвай цIийи къанунди РФ-дин мулкунал кьиле физвай женгинин гьерекатра иштиракай военный къуллугъчийрин аялриз уьлкведин вузрик кьезил къайдада (пулсуздаказ) экечIдай ихтияр гузва. И къарар тестикьарзавай документ сайтда чапнава.
Пешекарри къейдзавайвал, и къарар ватандин хатасузвал хвейи диде-бубайрин вири аялар патал сад хьтин ихтиярар таъминарунин рекье важиблу кам я.
ЦIийи къанундин бинедаллаз, бакалавриатдин ва специалитетдин программайрай кIелун патал вузрик экечIдайла, кьетIен ихтиярар военный къуллугъчийрин, жаза кьилиз акъуддай гьукумдин федеральный органрин, къенепатан крарин органрин ва уголовно-исполнительный къурулушдин къуллугъчийрин аялриз ганва. Агьалийрин и категориядин векилар Россиядин Федерациядин мулкунал кьиле фейи женгинин гьерекатрин иштиракчияр хьун лазим я, къанунди лагьайтIа, абурухъ бюджетдин гьисабдай, яни пулсуздаказ кIелунин жигьетдай авай ихтияр тестикьарзава.
Къейдзавайвал, къецепатан уьлквейрин мулкарал кьиле фейи женгинин гьерекатрин иштиракчийриз (месела, Сирияда ва я Афгъанистанда) ихьтин ихтияр икьван чIавалдини, яни дегишвилер кухтадалдини авай. Гьа са вахтунда Россиядин Федерациядин мулкунал кьиле фейи дяведин гьерекатра иштиракайбурун (месела, Чечняда) аялриз кьетIен кьезилвилер авачир. Гила и фаркь арадай акъуднава.
Хабар гузвайвал, гележегда ветеранар жуьрейриз пай тавун патал алава серенжемар кьабулда — абуруз виридаз сад хьтин кьезилвилер ва заминвилер таъминардайвал.
Саида Мурадова
