Махачкъалада ФСИН-дин къурулушда кIвалахзавай кьасумхуьруьнви майор Аслан Къурбановаз Россиядин Президент Владимир Путинан Указдалди «Ватандин вилик лайихлувилерай» 2-дережадин ордендин медаль гана.

Ам Къурбановав ФСИН-дин регьбер А. Гостева Москвада шад гьалара вахкана.

Машгьур спортсменрин-тренеррин хизандай тир Аслан, вичин буба ва имияр хьиз, спортдин са шумуд жуьредай чIехи дережаяр къазанмишнавай  ва и кар давамарзавай спортсмен я. Кьилди къачуртIа, А. Къурбанов универсальный женгерай 4 сеферда дуьньядин чемпион, спортдин самбодай Россиядин чемпион, дзюдодай Россиядин Кубокдин призер, спортдин лайихлу мастер я.

Аслан Къурбанов вичи кIвалахзавай къурулушда дерин чирвилер авай, кIвалахда агалкьунар къазанмишзавай, юлдашрин арада еке гьуьрмет авай пешекар, хъсан кьилихрин, рикI михьи, ширин мез авай инсан я.

Ватандин вилик лайихлувилерай ганвай гьукуматдин чIехи шабагь мубарак авуналди, чаз Аслан Къурбановахъ мягькем сагъламвал, хизанда хушбахтлувал, кIвалахда ва спортда мадни еке агалкьунар хьана кIанзава.

Хазран Кьасумов