Чаз кхьизва
Ни и дуьньяда зулумриз, дявейриз, ислягь уьмуьр къурхулувилик кутадай маса гьерекатриз рехъ гузватIа, абурув кутугай жазани агакьда. Аллагьди инсанар халкьна ва абур патал икьван иер, тIебиат, девлетлу чил арадал гъанва. Ада сада-садаз куьмекар гун, стхавилелди, дуствилелди яшамиш хьун, масабур зулумрик кутун тавун буйругънава. Динар гьар жуьрединбур аватIани, Аллагь сад я, чна адан буйругъар кьилиз акъудун герек я.
Инсаният кIани инсанри, авай вири мумкинвилерикай менфят къачуна, дуьньядин жуьреба-жуьре уьлквейра кьиле физвай дявейрал эхир эцигдай серенжемар кьабулун герек я. Россиядинни Украинадин, чувудринни арабрин ва масабурун арада авай дявеяр акъвазрун патал ислягьвилин икьрарар кутIунна кIанда.
Зи фикирдалди, Владимир Зеленский къанунсуздаказ, жуьреба-жуьре кьуьруькрикай менфят къачуна, Украинадин гьукумдин кьиле акъвазна. Пешедал гьалтайла, къабачи тир и акьалтIай амалдарди миллионер Порошенкони кваз метIерал акъвазарна. Гьа вичин кьуьруькрин куьмекдалди Россиядиз акси сиясат тухуз гатIунна, дяведик кьил кутуна, агъзурралди украинвияр телефна. Европадин хейлин уьлквейрин ва Америкадин регьберрин куьмекдикай менфят къачуна. Европадин уьлквейри Россиядиз акси дяве тухузвай Зеленскийдин тереф хуьзва.
Хъуьруьн къведай, къаб алай ихтилатар гвай къабачидиз Россиядал гъалиб жез кIанзава. Россиядихъ бес кьадар чилер-мулкар, тIебиатдин девлетар, чIехи армия, гужлу яракь — вири ава! Ам садалайни аслу туш ва ам садахъни муьгьтеж туш. Россияди садални гьужумзавач, амма ада вичин халкь, часпарар, чилер садавни зулумдик кутаз тадач. Я Зеленскийдихъ, я адан Европадин амадагрихъ Россия метIерал акъвазардай такьат авач.
Тарихдай малум тирвал, СССР-дихъ Гитлеран тереф хуьзвай Европадин хейлин уьлквеяр кьадай мумкинвал авай. Амма Сталина а кар авунач, ада халкьдин куьмекдалди хайи чил хвена, къецепатан маса уьлквеярни фашистрикай михьна.
Россия гьахълу ва адан ниятарни михьи я. США-дин тапан сиясатдайни кьил акъатзавач. Са патахъай, Трампаз Украинада дяве акъвазариз кIанзава ва и кар кьилиз акъудун патал Зеленскийдихъ галаз чилин кIаник квай ва чпихъ еке къимет авай ресурсрин гьакъиндай икьрарар кутIунзава. Муькуь патахъай, Украинадиз яракьралди, пулдалди куьмек гун давамарзава. Суал арадал къвезва: вучиз? Къаст гьихьтинди я? Гъавурда гьатун четин туш. Россиядин девлетра вил авай душмандин мурад сад я: ам зайифарун ва чпелай аслу авун. Им са вахтундани кьилиз акъатдай кар туш.
Рафик Агъасиев,
Махачкъала
