11-августдиз Мегьарамдхуьруьн къекъуьндал спортдал рикI алай 70 кьван кас кIватI хьанвай. Абур Мегьарамдхуьруьн райондин 75 йисан юбилейдиз талукь велопробегда иштиракиз атанвайбур тир.
Райондин юбилей къейдунин чIехи суварин къаршида им нубатдин мярекат я. Гьава циф авайди тиртIани, сятдин муьжуьдаз вири велосипедрал алаз гьазур яз акъвазнавай. Аник Мегьарамдхуьруьн 1 ва 2-нумрайрин школайра кIелзавайбур, пешекар спортсменар ва спортдал рикI алайбур квай. Спортшколайрин тренерри, райадминистрациядин физический культурадин ва спортдин, жегьилрин крарин рекьяй отделрин векилрини иштиракна.
Спортдин мярекат ачухдайла, райондин кьилин заместитель Ариф Гьажиев рахана.
Велопробегдин маршрутар, яшариз килигна, виликамаз тайинарнавай. Абурун колонна полициядин векилрин гуьзчивилик квай.
Гъалибчияр грамотайриз ва пулдин премийриз лайихлу хьана.
Гьазурайди — Дагъви Шериф
