Цналрин хуьре яшамиш жезвай Абумислимов Имирчубан Финляндиядихъ галаз хьайи дяведай уьзягъдаказ хтанай. Диде Буьгуьмагъани хциз мехъер ийида лугьуз гара авай… Амма Германияда фашизмдиз рехъ ачухай Гитлера башламишай инсафсуз ва залан дяведи и шадвал квадарна. Абумислимов Имирчубан кьвед лагьай дяведиз рекье гьатна. А вахтунда адан 23 йис тир. Адахъ галаз санал Хив райондин военкоматдиз хуьряй адалай гъвечIи жегьиларни фена: Мисриев Магьмуд, Балиханов Къурбан, Сфиев Султали, Мирзалиев Ферзали, Усманов Гьадай…
Гьар жуьредин частариз акъатай абур душмандин хура, дагълар хьиз, акъвазна. Имирчубан лагьайтIа, тежриба авай красноармеец хьуниз килигна, Воронеждин сержантар гьазурдай школадиз ракъурна. Гуьгъуьнлай ада Харьковдин 252-нумрадин лишанчийрин дивизиядин разведкадин ротада къуллугъна.
1942-йисан 8-апрелдиз адал кьезил хирер хьана. Госпиталда хирер сагъар хъувурла, ам мад женгериз хъфена. Вахтар лап четинбур тир. Душманди виликди гьерекатзавай. 1943-1944-йисара Имирчубана РагъакIидай патан фронтдин частарик кваз женгера иштиракна.
1944-йисан январдиз Белгороддин патав хьайи женгина Абумислимовал залан хирер хьана. Адан эрчIи кIвач гуьллейри кукIварна. Пуд вацра госпиталда къаткана. Имирчубан хуьруьз кьвед лагьай группадин инвалид яз хтана ам ислягь зегьметдив эгечI хъувуна. Ада Ф. Энгельсан тIварунихъ галай колхозда вичелай алакьдай кIвалахар авуна. Ахпа викIегь зегьметкеш хуьруьн жемятди колхоздин председателвиле хкяна.
Лугьуз жеда, ада седривиле кIвалахай йисара майишат гьам малдарвилин, гьамни магьсулдарвилин хилерай вилик фена, планар артухни алаз ацIуриз, жемятдин дуланажагъни хъсан хьана.
Ватандин ЧIехи дяведин иштиракчидихъ туькIвей къалин хизан хьана. Веледри Ватандин гьар са пипIе намуслудаказ кIвалахзава ва алай вахтунда мад кьил хкаж хъувунвай душманрал гъалибвал къачуникни чпин лайихлу пай кутазва.
Рамазан Велибегов
