26-майдиз Москвада яргъал чIугур азардик Дагъустандин машгьур журналист, жемиятдин векил, муаллим Аликбер (Алик) Абдулгьамидович Абдулгьамидов рагьметдиз фена. Адан 69 йис тир.
А. Абдулгьамидов 1956- йисан 10-майдиз Мегьарамдхуьруьн райондин Вини Ярагърин хуьре муаллимдин хизанда дидедиз хьана. Мектеб акьалтIарайдалай кьулухъ художественный училищеда кIелунар давамарна. Советрин Армиядин жергейриз къуллугъ ийиз фидалди, ада хуьруьн мектебда рисованидинни черченидин муаллим яз кIвалахна.
1985-йисуз Ростовдин госуниверситетдин журналистикадин факультет акьалтIарна. Вуздилай гуьгъуьниз хайи республикадиз хтана ва «Дагъустан» ГТРК-да мухбир яз кIвалахиз гатIунна. Ина ада жемиятдинни сиясатдин программайрин ведущийдин везифаяр тамамарна. Тамашачийри ада гьазурзавай хци репортажар, документальный фильмаяр иллаки хушдиз кьабулзавай.
1996-йисуз Радуеван кIеретIри Къизляр шегьердал гьужумайла, Алик Абдулгьамидова а вакъиайриз талукь гьакъикъи гьаларикай дагъустанвияр хабардар ийизвай репортажар гьазурна. А вахтунда чи кьегьал ватанэгьлиди акьалтIай викIегьвал къалурнай: боевикрин гъиле гьатнавай дишегьлиярни аялар азад авун патал ада гуьгьуьллудаказ вич террористрин залуквиле кьабулиз тунай.
1998-йисуз Алик Абдулгьамидовакай Кеферпатан Кавказда Сад лагьай каналдин махсус мухбир хьана. Ада федеральный дережадин канал патал регионда кьиле физвай важиблу вакъиайрикай, гьа жергедай яз, Дагъустандинни Чечнядин мулкарал кьиле фейи дяведин гьерекатрикай репортажар гьазурна.
Журналиствилин пешедивай къерех тахьана, ада вузда муаллим язни кIвалахзавай: ам ДГУ-дин электронный СМИ-рин кафедрадин старший преподаватель тир. 2014-йисалай СМИ-рихъ галаз алакъаяр хуьнин рекьяй Махачкъаладин гьуьлуьн портунин генеральный директордин куьмекчи яз кIвалахна.
Алик Абдулгьамидован къелемдикай са шумуд ктаб хкатна. Абурун арада «Крах операции «Скорпион», «Хроника кизлярско-первомайской трагедии», «Новолакский рубеж. Хроника неизвестной войны», «Герои моего времени и варвары. Хроника современной жизни» ва масабур ава. И ктабриз журналистри еке къимет гана ва абурукай неинки Дагъустанда, гьакI адалай къецепатани рахана.
Алик Абдулгьамидов жемиятдин краривайни къерех хьанвачир: РД-дин Общественный палатадин член, региондин журналистика вилик тухудай «Каспий-Медиа» центрадин регьбердин заместитель яз кIвалахна, ОНФ-дин Дагъустанда авай штабдин векил яз, дагъустанвийриз жуьреба-жуьре месэлаяр гьялиз куьмекна.
Яргъал йисара гьакъисагъвилелди журналистикадин хиле кIвалахунай Алик Абдулгьамидоваз гьукуматдин, жемиятдин тешкилатрин патай хейлин шабагьар гана. Ам кьве сеферда Артем Боровикан тIварцIихъ галай международный дережадин «Честь. Мужество. Мастерство» ва Дагъустандин журналистрин Союздин «Золотой орел Дагестана» премийриз лайихлу хьана. 2019-йисуз адаз РФ-дин Гьукуматдин премия гана. Къейд ийин хьи, Алик Абдулгьамидов дагъустанвийрикай и премиядиз лайихлу хьайи сад лагьай кас я. Адан шабагьрин арада Дагъустандин Гьукуматдин, РФ-дин журналистрин Союздин «Золотое перо России» премияр, «ВикIегьвиляй» медаль ва хейлин масабур ава.
Алик Абдулгьамидов рагьметдиз финихъ галаз алакъалу яз, адан хизандиз, мукьва-кьилийриз башсагълугъвал гайибурун арада Дагъустандин Кьил Сергей Меликовни ава. Вичин телеграм-каналда чапнавай макъалада ада Алик Абдулгьамидован чIехи алакьунар ва республикадин журналистика вилик тухуник ада кутур пай къейдна.
«Лезги газетдин» редакциядин коллективди, Алик Абдулгьамидов рагьметдиз финихъ галаз алакъалу яз, адан хизандиз, стха Низами Абдулгьамидоваз ва вири мукьва-кьилийриз, дериндай хажалат чIугунивди, башсагълугъвал гузва. Адан экуь къамат чи рикIера амукьда.
И макъаладихъ галай шикилдин куьмекдалди, «SilicaAR» приложение кутуна, Алик Абдулгьамидовакай гьазурнавай видеодиз килигиз жеда. ТIвар кьунвай приложение андроид телефонра - «Плеймаркетдин», айфонра «App Store»-дин куьмекдалди кардик кутаз жеда.
