Са шумуд югъ идалай вилик Каспийскда, Али Алиеван тIварунихъ галай спорт­комплексда, азаддаказ кьурша­хар­­ кьунай, Али Алиеван экуь къамат­ рикIел хуьн яз, международный 55-тур­нир кьиле фена. Акъажунар тамам­ 3 юкъуз (17-19-май) давам хьана­. Шад­вилелди хабар гуз кIанзава хьи, кIвен­кIвечи чкаяр кьурбурун арада чи ватан­эгьлиярни ава. ИкI, вичин бубайрин ери-бине Ахцегь райондай тир машгьур спортсмен Рамазан Ферзалиева 65 кг-дал къведалди заланвал­ авай­бурун арада инанмишвилелди гъа­либвал къа­занмишна. Финалда Р. Фер­залиеваз Калининграддин патай экъечIнавай Арипгьажияв Абдулаев 13:2 гьисабдалди кумукьна. Чи машгьур спортсмен, алай вахтунда Азербайжандин патай экъечIзавай, Ахцегьай тир Жабраил Гьажиев (79 кг-дал къведалди заланвал авайбурун арада­) буьруьнждин медалдиз лайихлу хьана.

РикIел хкин: Р. Ферзалиев международный ва Вирироссиядин хейлин турниррин, континентрин уртах Кубок патал акъажунрин гъалибчи ва призёр, Дагъус­тандин жаванрин арада чемпион, Россиядин Кубок патал акъажунра виридалайни хъсан спортсмен, международный классдин спортдин мастер я. Гила ада азаддаказ кьуршахар кьунай кьиле фидай Россиядин чемпионатда иштиракда.

Виликан йисара хьиз, цIини А. Алиеван турнирда Россиядин регионрай, гьа гьисабдай яз Дагъустандай тир спорт­сменрилай гъейри, дуьньядин са шумуд уьлкведайни, гьа гьисабдай яз Туьркиядай, Сербиядай, Швейцариядай, Туьр­к­ме­­­нистандай, Узбекистандай, Къиргъизис­тандай, Азербайжандай ва Тунисдай атанвай пагьливанри заланвилин 10 категориядай гьасиррал чпин устадвал къалурна. Турнир ачухуниз талукьарнавай шад мярекатдал Дагъустандин спортдин министр Сажид Сажидов, машгьур спорт­смен, физкультура ва спорт вилик тухунин рекьяй общественный советдин председатель Мегьамедхан Арацилов ва масабур рахана. Абуру Дагъларин уьлкведин зурба­ пагьливанрикай сад — СССР-дин лайихлу­ тренер ва спортдин мастер, дуьньядин      5 сеферда чемпион, Советрин Союздин 9 сеферда чемпион Али Алиеван уьмуьрдин ва спортдин рехъ, А. Алиев­, зурба пагьливан хьиз, тIвар-ван авай са жерге спортсменриз хъсан тербия ва вердишви­лер гуз алакьай тежрибалу тренер­ни яз машгьур хьайиди рикIел хкана, гьасиррал экъечIиз гьазур хьанвай спорт­сменрихъ агалкьунар хьун алхишна. А. Алие­ван хва Зурканай Алиевича турнир хъсан дережада аваз кьиле тухунай адан тешкилатчийриз ва иштиракчийриз хъсан адет давамарунай сагърай лагьана.

Рагнеда Рамалданова