17-майдиз, чи халкьдин игит, машгьур полководец, РагъэкъечIдай патан Кавказдин халкьарин милли азадвал патал гьерекатдин башчи Гьажи Давуд Муьшкуьрвидин экуь къаматдиз бахшна, яргъал мензилдиз чукурунин серенжем кьиле тухвана. ИкI, Махачкъаладай рекье гьатай адан иштиракчийри, къадим Дербентдай яна, Ахцегь райондин Чеперин хуьре рехъ акьалтIарна.
Къейд авун лазим я хьи, сифтедай 250 км рехъ кьве юкъуз атIун пландик кутунвай, амма адан иштиракчийри, эстафета сада-садав вугуз, и рехъ 14 сятина атIана. ИкI, экуьнин ярарихъ галаз Махачкъаладай рекье гьатай абур нянихъ рагъ акIидалди Чеперин хуьруьв агакьна. Серенжемда жуьреба-жуьре яшарин инсанри иштиракна. ИкI, 7 йиса авай Аиша Абдурагьманова (ада 3 км-диз чукурна) виридалайни гъвечIиди тир. Дербентдин агьали Алиев Салигь (65 йис) — виридалайни чIехиди, ада 20 км-диз чукурна.
Яргъал мензилдиз чукурайбуру Гьажи Давудан шикил алай пайдах сада-садав вугузвай. Рекье абур са шумуд чкадал ял ягъиз, фу нез, яд хъваз акъвазна, вири санал кIватI хъжез, ни гьи мензилдиз звердатIа, меслятариз хьана.
И кардик кьил кутунвайбурукай сад тир Казбек Абдурагьманова къейд авурвал, серенжемдин макьсад Гьажи Давуд хьтин къагьриман халкьди рикIелай ракъур тавун, тийижирбуруз ам вуж тиртIа чирун, жезмай кьван гзаф инсанар спортдиз мукьва авун, сагъламвал хуьн, инсанрин арада дуствал мягькемарун тир.
— Чун алахъна кIанда чи халкьдин тарих, лезги чIал, адетар хуьз ва жегьилрив, къвезмай несилрив агакьариз, — алава хъувуна ада.
Меркездай дагъдин хуьруьз 250 км мензилдиз чукурун рикIел аламукьдай вакъиадиз элкъвена. Серенжемдин тешкилатчийри ана иштиракайбуруз сагърай лагьана.
Рагнеда Рамалданова
