Кьакьан буйдин, къалин рацIамрин кIаникай фагьумлу вилер килигзавай и кас чин тийидайбур районда бажагьат жагъидай. Ихтилатдал рикI алай, вич диндирмишай касдиз ваъ лугьуз тежедай, гъиле авай «кузвай» карни туна, масадан дерди вилик кутадай ам гьамиша инсанрин юкьва, кардик кваз аквадай. Чи чIехи буба Асамудин ам чидайбурун рикIера сабурлу, эдеблу, регьимлу, масадан хийирдихъ галай кас яз ама. ЧIехи Гъалибвал къазанмишайдалай инихъ 80 йис алатнавайла, фронтовик фейи рехъ рикIел хкун адаз чи патай мад сеферда гьуьрмет ва икрам авун жеда.
Асваров Асамудин 1913-йисан 10-майдиз Гарагърин хуьре араб чIалан алим Ризванан хизанда дидедиз хьана. Чирвилерихъ адан гъвечIи чIавалай майил авай. Школа акьалтIарайдалай гуьгъуьниз ада 1939-йисуз Буйнакскда зоотехниквилин пеше къачуна. Гьа и йисуз ам эвленмишни хьана.
1940-йисан 28-июндиз чи бубадиз Яру Армиядин жергейра къуллугъ ийиз эвер гана. Ленинграддин военный округдиз акъатай адакай 2830-частунин артиллериядин 106-батальондин пулеметчик хьана. 1941-1944-йисара фашистри гьалкъада тунвай Ленинград ада душмандин гьужумрикай хвена. Аскердал кьве сеферда хирер хьана. Сагъ хъхьайла, ада мад яракь гъиле хкьуна. Ватандин ЧIехи дяведин рекьерай ам, гагь пулеметчик, гагь телефонист яз, кьиляй-кьилиз фена. 1945-йисан декабрдиз хурудал Баркалладин III дережадин, Ватандин дяведин II дережадин орденар, «Женгинин лайихлувилерай», «Жуьрэтлувиляй» «Ленинград хуьнай», «Германиядал гъалиб хьунай» медалар алаз хтана.
Дяведай хтайдалай кьулухъ Асамудин Ризванович Хасавюртдин хуьруьн майишатдин техникумдиз гьахьна, ада агрономвилин пеше къачуна.
Пенсиядиз экъечIай 1973-йисалди (ада персональный пенсия къачузвай) ада Макьарин ва Гарагърин хуьрера агрономвилин, колхоздин председателдин заместителвилин, хуьруьн советдин председателдин къуллугъар тамамарна. Гьилле, таб квачир Асамудин Ризвановича виринра вич кар алакьдай, ихтибарнавай кIвалахдин жавабдарвал гьисс ийидай пешекар, намуслу инсан яз къалурна. Гьавиляй ам майишатдин ва культурадин эцигунра активвилелди иштирак авунай ДАССР-дин Верховный Советдин Президиумдин Гьуьрметдин 3 грамотадиз, «Зегьметдин ветеран» ва юбилейрин медалриз лайихлу хьана. Гарагърин юкьван школа Асваров Асамудинан тIварцIихъ янава.
Жавабдар къуллугърал хьайи вахтунда чIехи бубади вичин хайи хуьр аваданламишунин, агьалийриз кIвалахдай къулай шартIар тешкилунин кардик еке пай кутуна. Агьалияр хъвадай целди, электроэнергиядалди таъминарна. Адан регьбервилик кваз хуьруьн администрациядин, школадин дараматар эцигна.
Ветеран чIехи хизандин кьил тир. Ада кьуд хвани пуд руш тербияламишна, уьмуьрдин рекьел акъудна.
Къе, Гъалибвилин 80 йисан юбилейдин сувариз, чна несилрин азадвал ва аслу туширвал патал женг чIугур ветеран мад сеферда рикIел хкизва ва адаз, юкь агъузна, икрамзава. Чна фронтовик бубадал дамахзава.
Марьям ва Муслимат Велихановаяр
