Гъалибвилин суварин юкъуз Дербент райондин Белиж поселокдин «Ахниг» микрорайонда Ватандин Чlехи дяведа фашистрихъ галаз тухвай женгера телеф хьайи ахнигвийриз мемориалдин комплекс ачухдай мярекат хъсан тешкиллувал аваз кьиле фена.
1966-йисуз хьайи залзаладикди Белиждиз куьч хьайи ахнигвийрикай поселокда тамам са микрорайон арадал атанва. Дагъда авай хуьре Ватандин Чlехи дяведа телеф хьайи игитар рикlел хуьнин лишан яз, хуьруьн вилик-кьилик квай векилар Гъалибвал къазанмишна 80 йис тамам жедайла, кьегьал рухвайриз бахшнавай имарат туькIуьрунин фикирдал атана.
Чкадал алай ва патара авай ахнигвийри лазим такьатар кlватlна ва тешкиллувилин кlвалахар акьалтlарна.
Хуьруьн жемятдилай гъейри, мярекатда Махачкъаладай, Кьурагьай, Маллакентдай ва масанрай хтанвай мугьманрини иштиракна.
Мярекат кьиле тухузвай Сефербег Сефербегован гафарай малум хьайивал, Ахнигай, Ватан хуьз, 56 кас фена. Чlехи пай женгера телеф хьана, хуьруьз анжах 14 кас хтана.
— Ватандин Чlехи дяве акьалтIна 80 йис хьанва. Йисар мадни фида. Несилар дегиш жеда. Бубайрин кьегьалвилер чна чи рикlелай садрани алуддач, — лагьана ада, мемориалдин комплекс ачухиз, Ватандин Чlехи дяведин иштиракчийрин багърияр гьуьрметлу Гуьл Агъахановадиз ва Лумунат Мустафаевадиз эверна.
Уьтквем рухвайрин имаратдал цуькверин кlунчlар эцигайдалай гуьгъуьниз хуьруьн тарихдикай, баркаллу инсанрикай Абдул Семедова, Велихан Элифханова, Несред Мустафаева суьгьбетна. Абуру бубайрин ихтилатар рикlел хкана, сваркадин кlвалахар вичин патай тамамарай Гьамид Шевлиеваз ва мемориалдик пай кутур гьар са хуьруьнвидиз сагърай лагьана.
Рахунрин арайра Хадижа Сефербеговади, Малика Къурбановади, Гуля Балабеговади, Саният Мирзоевади, Саидагьмед Гьажибалаева ва Фатима Гьажибалаевади шиирар кlелна.
Мярекат, дяведа телеф хьайибур рикlел хуьн яз, са декьикьада кисна акъвазуналди ва аялри цавуз шарар ахъаюналди акьалтlна.
Къагьриман Ибрагьимов
