ЧIехи Гъалибвилин 80 йисан юбилейдин сергьятра аваз, чи машгьур ватанэгьли, сенатор Сулейман Керимова Дагъустандай тир Ватандин ЧIехи дяведин иштиракчийриз пулдин куьмек гудай къарар кьабулна.
РД-дин Кьил Сергей Меликова вичин телеграм-каналда хабар гайивал, С .Керимова дагъустанви ветеранриз гьар садаз 5 миллион манатдин кьадарда аваз пулдин куьмек гана. Идалай гъейри, ада дяведин йисара Ленинграддин гьалкъада ва фашистрин концлагерра хьайи ватанэгьлийриз гьар садаз 2 миллион манат пул чара авуна.
Идалди ЧIехи Гъалибвилин 80 йисан сергьятра аваз, С. Керимова малумарай мергьяматлувилин серенжем акьалтIнач. Ада Украинада кьиле физвай махсус серенжемда Россиядин Федерациядин Игитдин тIварцIиз лайихлу хьайи вири дагъустанвийрин хизанризни 5 миллион манатдин кьадарда аваз пулдин куьмек гана. Гьа ихьтин кьадарда аваз пулдин куьмек СВО-дин иштиракчи, саки пуд гьафтедин къене текдиз душмандин гуьллейрин кIаник амукьай ва, гьикьван четин хьанатIани, вичел ихтибарнавай везифаяр кьилиз акъудай дагъустанви Закарья Алиевавни агакьна.
«ЛГ»
