Дагъустан Республикадин Кьил Сергей Меликова 13-майдиз йикъан месэлайриз талукьарнавай совещание кьиле тухвана. Ингье абур: гьукумдин органри агьалийрин арзайриз жаваб гузвай гьал; СМИ-ра ва интернетда гьукуматдин органрин регьберри, районрин ва шегьеррин кьилери активвал къалурун; 15-16-апрелдиз хьайи тIебиатдин бедбахтвилери зиянар гайи агьалийриз куьмек авун; чкадин туризмдиз талукь проектрин сергьятра аваз уьмуьрдиз кечирмишзавай объектар авай гьал; муниципальный тешкилатрихъ галаз санал газдалди таъминарзавай объектар эцигдай чкаяр тайинарун ва туькIуьрун; дяведин ветеран, Россиядин Игит Ибрагьим-Паша Садикьован тIалабун — меркездин Гьамидован куьчеда авай са кIвалерин гьаят аваданламишун; Дагъустанда рекламадиз талукь кIвалах авай гьал.
Винидихъ къейднавай месэлайрив эгечIдалди вилик региондин Кьили ЧIехи Гъалибвилин 80 йисан юбилейдихъ галаз алакъалу мярекатар тешкилайбуруз ва анра иштиракайбуруз сагърай лагьана. Ада гьукуматдал, парламентдал ва министерствойрал сувар кьиле тухуник еке пай кутурбур шабагьралди къейд авун тапшурмишна.
Мярекатдал малум хьайивал, апрелдин вацра Дагъустандин ЦУП-диз 7 агъзурдав агакьна арзаяр атана. Агьалийрик секинсузвал кутазвай месэлайрик, РД-дин АГиП-дин регьбер Махач Омарова къейд авурвал, электроэнергия тахьун, рекьер ремонт авун ва ара-ара яд атIун акатзава.
«Агьалийрин арзайрихъ галаз кIвалахун важиблу месэла я. И жигьетдай чаз хъсан чешне РФ-дин Президентди къалурзава. Заз лугьуз кIанзавач хьи, чахъ и рекьяй хъсан делилар авач. Алатай йисарив гекъигайла, и кIвалахда хейлин дегишвилер жезвайди аквазва. Чи мярекатрал чна тухузвай кIвалахдиз къиметни гузва. Куьне и рекьяй хъсан тежриба кIватIнава. Амма ара-бир мягьтелардай хьтин крарни кьиле физва. Муниципалитетри, кар алай месэладиз, дердиниз фикир тагана, 2-3-5 йис идалай вилик гьялна куьтягьна кIанзавай месэлаяр майдандиз акъудзава», — къейдна Сергей Меликова.
Социальный сетрикай активвилелди менфят къачузвай ва агьалийрихъ галаз датIана алакъа хуьзвай гьукумдин органрин регьберрин гьакъиндай делилар РД-дин Кьилин ва Гьукуматдин Администрациядин регьбердин заместитель ва РД-дин Кьилин пресс-къуллугъдинни информациядин сиясатдин управленидин начальник Рашид Акавова гана.
Адан гафаралди, СМИ-ра ва интернетда активвал къалурзавай депутатрин арада сад лагьай чкадал РД-дин Халкьдин Собранидин Председатель Заур Аскендеров, адан гуьгъуьнал депутатар тир Велиюлла Фаталиев, Елена Павлюченко, Муртазали Рабаданов, Юрий Левицкий, Гьасан Османов, Осман Булатов, Камил Давдиев, Марат Алияров ва Асият Алиева ала.
Муниципалитетрин кьилерин арада мартдинни апрелдин варцара сад лагьай чка Махачкъаладин администрациядин кьил Юсуп Умавова кьуна. СМИ-рикай, интернетдикай чпин кIвалахда менфят къачузвайбурук Табасаран райондин кьил Мегьамед Къурбанов, Избербаш шегьердин кьил Расул Бакаев, Хасавюртдин — Корголи Корголиев, Сергокъала райондин — Арсен Мегьамедов акатзава. Гьукумдин крар идара ийидай регьберрикай РД-дин экономикадин ва мулкар вилик тухунин министр Гьажи Султанов, жегьилрин крарин рекьяй министр Камил Саидов, культурадин министр Зарема Бутаева къейдна.
Малум хьайивал, бязи регьберар соцсетра ва СМИ-ра кIвалах авунин месэладив гьакI тIвар паталди эгечIзава. Ида агьалийрихъ галаз авай алакъаяр тахьай мисал ийизва.
ТIебиатдин бедбахтвилери зиянар гайибуруз куьмек гузвай гьалдикай РД-дин Гьукуматдин Председателдин заместитель Рамазан Жафарова малумат гана. Ада лагьайвал, Кьурагь, Ахцегь, Докъузпара, Рутул районрин хуьрерин агьалийрив тайин кьадар пулар агакьна. Махачкъала шегьерда зиянар гайи 64 хизандиз куьмек ганва, амайбуруз и мукьвара гуда. Бязи чи ватанэгьлийри кIеве гьатайбуруз эцигунардай материалралди, пуларалди мергьяматлувилин куьмекар гана.
РД-дин энергетикадин ва тарифрин рекьяй министрдин заместитель Динислам Иманмурзаева газдин объектар тайинаруниз талукь схемаяр туьIуьрзавай гьалдикай лагьана. Къенин йикъалди 34 муниципалитетдин хуьрера газдин турбаяр тухунин кIвалах акьалтIарнава. Ада алава хъувурвал, алай вахтунда министерстводи 2026-2030-йисара дагъустанвияр газдалди таъминаруниз талукь программа туькIуьрзава.
Хийир Эмиров
