Медресада чирвилер къачур Саидагьмеда лезги ва туьрк чIаларал шиирар теснифна. Сифте яз шаирдикай Гъ. Садыкъиди малуматар гана, адан шиирар печатдиз акъудна. Гъилин кхьинра адан тIвар Агьмед ал-Ахты яз къалурнава. ЧIехи устадвал хас Саидагьмедан эсеррай ам лап кIевелай вичин ватандал, хайи чилел ашукь кас тирди аквазва. Мисал яз, «Ахцегьрин тариф» шиирда ада лугьузва:
Ахцегьрин уьмуьр фида гьар са чIавуз сувар хьтин,
Гуьзел партал алаз абур аквадайд я чамар хьтин,
Душманари гьужумайла къвазда чеб асланар хьтин,
Яракьарни ава абурухъ Рустам-Залан турар хьтин,
Виридалай винизди я намус, гъейрат, ар Ахцегьа.
«Лезги газетдин» 2025-йисан 17-нумрадай
