2025-йисан гатфариз Дагъустанда, санлай къачурла, 500 гектардин майданра багълар кутадайвал я, хабар гузва Россельхозцентрадин Дагъустанда авай фи­лиалди. Къелемар цунин кIвалах башламишдалди вилик  и чилерал агротехникадин  хейлин кIвалахар тамамарнава: михьун ва чилерин участокар гьазурун, миянардай шейэр кутун, яд гудай къурулушар арадал гъун, лазим тир алатар маса къачун.

Асул гьисабдай багълара шуьмягърин­, хутун, пIинидин, ичин ва са жерге маса емишрин къелемар цун пландик кутунва. Хабар гузвайвал, эхиримжи кьуд йисан вахтунда республикада гьасилзавай къелемрин кьадар 8 сеферда гзаф хьанва. Эгер 2020-йисуз абурун кьадар анжах    165 агъзур тиртIа, шаз 1,3 миллиондив агакьна.

Россельхозцентрадин Дагъустанда авай филиалдин кьил Жанна Къазанбиевади рикIел хкайвал, багълар кутадайла, цазвай къелемар «Тумчивилин гьакъиндай» федеральный къанунда къалурнавай вири истемишунриз жаваб гудайбур, сортарин ерияр ва чпел тухванвай ахтармишунар тестикьарнавайбур  хьун лазим я. Абурук азарар ва я зиянкар гьашаратар хьана кIандач, гьакIни чкадин накьвадихъ ва гьавадихъ галаз кьадайбур хьун лазим я.

РикIел хкин, 2024-йисуз Дагъустанда, планда къалурнавай кьадар 600 гектар яз. 850 гектардин майданра багълар кутуна. И хиле зурба инвестпроектар  «Полоса» ва «Анжелина» ООО-ри, «Багъ» КФХ-ди уьмуьр­диз кечирмишзава.

Амина Муслимова