2-майдиз Ахцегь районда гьатта тарих патал еке важиблувал авай вакъиа кьиле фена — ина 70 гектардин мулкунал лап еке бегьерлувилин (суперинтенсивный) багъдин сифтегьан къелемар цунин мярекат кьиле фена. Гьисабзавайвал, им Ахцегьрин машгьур багълар арадал хкунин карда сифтегьан кам я. Фикир желбдай кар ам я хьи, цIийи жуьрединди тир и багъдиз тешпигьбур, яни гьуьлуьн дережадилай агъзур метрдилай гзаф вине авай маса багълар Россиядин мулкунал мад алач.
Мярекатда Дагъустан Республикадин Гьукуматдин Председателдин заместитель Нариман Абдулмуталибова, РД-дин хуьруьн майишатдин ва недай суьрсетдин министрдин заместитель Шарип Шарипова, меценат Жамалдин Пашаева (Ахцегьрин багъларин машгьурвал арадал хкуниз талукь адан ватанпересвилин фикирдин тереф Ахцегь райондин кьил Абдул-Керим Палчаева ва райондин агьалийри хвена) иштиракна. Кьабулай дуьз къарардин нетижада тахминан 100 касдиз кIвалахдин чкаяр хьанва.
Гележегда багъдин майданар 130 гектардив агакьдайвал гегьеншарда, идахъ галаз сад хьиз кIвалахдин чкаярни, райондин бюджетдиз къвезвай къазанжиярни артух жеда. ЧIехи карханаяр арадал гъуни, гьисабзавайвал, райондай агьалияр масанриз куьч хьунин ва яшайишдин къурулушар виликди тухунин месэлаярни гьялиз куьмек гуда.
Гьасилнавай ичерин бегьер йисан кьиляй-кьилиз хуьн патал карханади 10 агъзур тонн емишар хуьдай мумкинвал жедай гьамбарханани эцигун пландик кутунва.
Сифте къелемар цунин шад мярекатдал Абдул-Керим Палчаева районэгьлийриз и сувар тебрикна ва Жамалдин Пашаеваз, Агъасиеван тIварунихъ галай СПК-дин (виликан «Ахтынский» совхоздин) директор Фиридин Мисрихановаз (эгер ада и чилер хвеначиртIа, багълар кутунин кIвалах мумкин кар жедачир) сагърай ва разивилин келимаяр лагьана.
Шад мярекатда иштиракай райондин культурадин управленидин ва А. Жалиловадин тIварунихъ галай искусствойрин школадин къуллугъчийри театрдин тегьерда туькIуьрнавай сегьнеяр къалурна — «Ахцегьрин багълар» кьуьлуьналди абуру советрин девирдин колхозрин вахтунин легьзеяр ва Социализмдин Зегьметдин Игит Саимат Ферзалиевадин зегьмет рикIел хкана.
Идалай гуьгъуьниз шад мярекатдин иштиракчияр зуьрнединни далдамдин авазрик кваз къелемар цазвай участокдал рекье гьатна.
«Заз ихьтин багъ кутун райондин агьалийриз, гьакIни вири дагъустанвийриз тебрик ийиз кIанзава! Умуд кутазва хьи, хъсан гелкъуьн тешкилунин нетижада и багъди вири уьлкведиз машгъур Ахцегьрин ичер ва маса емишар гун хъийида. Къейд ийин хьи, им неинки машгьур хьайи ичерин ватан тир район патал тарихдин вакъиа, гьакIни чи экономика йигин еришралди вилик физвайди, чIехи карханаяр, хуьрера кIвалахдин чкаяр арадал хквезвайди тестикьарзавай ачух мисал я», — баян гана региондин кьили.
Проект уьмуьрдиз кечирмишунай Сергей Меликова райондин регьбердиз ва инвестордиз чухсагъул лагьана.
Амина Муслимова
