Апрелдин эхирра чав Дербентдай къайи хабар агакьна: 78 йисан яшда аваз, ракьун рекьерин лайихлу къуллугъчи, «Семафор» газетдин кьилин редактор, писатель, журналист Гьажиагъа Мегьамедшерифович Мегьамедшерифов рагьметдиз фена.
Гь.М.Мегьамедшерифов Мегьарамдхуьруьн райондин Гъепцегьрин хуьре дидедиз хьана. Хейлин йисара Дербент шегьерда ракьун рекьерин къурулушда жуьреба-жуьре къуллугърал кIвалахна.
Ам РФ-дин журналистрин союздин член тир. Адан къелемдикай «Дербент. Железнодорожный узел на рубежах веков», «Под стук колес», «100 лет профсоюзам железнодорожников Дагестана» ва маса ктабар хкатна.
Гь.М.Мегьамедшерифов «Лезги газетдин» редакциядихъ галаз сих алакъаяр хуьзвай авторрикай сад тир. Адан макъалаяр мукьвал-мукьвал газетдин чинриз акъатзавай.
«Лезги газетдин» редакциядин коллективди, Гьажиагъа Мегьамедшерифов рагьметдиз финихъ галаз алакъалу яз, адан хизанриз, вири мукьва-кьилийриз башсагълугъвал гузва.
«ЛГ»
