15-17-майдин йикъара Дагъустандин мулкунал аграрный хилен виридалайни чIехи мярекатрикай сад —   Россиядин жинсинин лапагрин  выс­тавка — 25-сеферда кьиле фида. Кье­тIендаказ къейд авун лазим я хьи, вири уьлкведин хипехъанар патал­ еке сувар тир и выставка галаз-галаз пуд йисуз Дагъустандин чилел тешкилуни уьлкведин куьлуь карч алай гьайванрин суьруьдин вадан са пай  гьалтзавай республикадиз  ийизвай ихтибардин гьакъиндай шагьидвалзава. Юбилейдин выставка,   идалай вилик йисара хьиз, Каспийск шегьердин  «Анжи-арена» стадиондал  тешкилда. Мярекатда месэладиз итиж ийизвай нивай хьайитIани пулсуздаказ иштиракиз жеда,  хабар гузва РД-дин хуьруьн майишатдин ва недай суьрсетдин  министерстводин пресс-къуллугъди.

Йиса садра кьиле тухузвай и мярекатдин тешкилатчияр  Россиядин Федерациядин хуьруьн майишатдин министерство, Дагъустан Республикадин Гьукумат ва хипехъанрин милли Союз я. РД-дин хуьруьн майишатдин ва недай суьрсетдин министерстводи «Хипехъанрин милли Союз» НО-дихъ ва «ФАНЦ РД»  ФГБНУ-дихъ галаз санал выставкада иштиракдай фикир авай (арзаяр ганвай) майишатрикай ибарат  сиягь  гьар юкъуз цIийи хъийизва.

ИкI, алай йисан, яни юбилейдин выс­тавкада уьлкведин 20 региондай тир ва жинсинин лапагар арадал гъунал машгъул  60-далай гзаф майишатри иштиракдайвал я. Абуру алаф патал ишлемишзавай чилерин ери хкажунин рекьяй авай мумкинвилер, ветеринариядин дарманар, зоотехникадин хиле меслятар, малдарвилин  хиле рекъемрин программайрин продуктар, сар гьялунин цIийи технологияр майдандиз акъудда, лапагрилай сар тунин  устадвал хкаждай мастер-классар тешкилда. ГьакIни жинсинин хипер ва цIегьер хуьнин карда авай агалкьунар майдандиз акъудда,  малдарвилин хилен суьрсет гьасилунин ва  гьялунин хилера ишлемишзавай алай аямдин технологияр раижда. Дагъустандин хипехъанри выс­тавкадал Дагъустандин дагъдин, Андидин, Тушетидин, Лезги, Эдильбайдин жинсерин хипер, Артлухдин меринос жинсинин гьайванар ва Заанедин жинсинин цIегьер гъида.

Выставкада иштиракун патал РФ-дин хуьруьн майишатдин ва промышленностдинни алишверишдин минис­терствойрай, гьакIни бязи къецепатан республикайрай  делегацияр атун гуьзлемишзава. Идалайни гъейри, мяре­катда Россиядин алимри, илимдин, образованидин ва жемиятдин тешкилатри, бизнесдин,  хипехъанвилин ва цIегьерхъанвилин суьрсет гьялунал машгъул карханайрин векилри иштиракдайвал я. Идалайни гъейри, выс­тавкадин сергьятра аваз, адет хьанвайвал ва  Россиядин Федерациядин халкьарин культура, адетар раиж авун патал, манияр ядай ва кьуьлердай ансамбларни желб авуналди, ина регионрин милли майданар ачухун пландик кутунва.

РД-дин Минтуризмди выставкадал­ республикадин халкьарин художест­венный сеняткарвилерихъ, Дагъустан­дин хипехъанвилел машгъул жезвай халкьарин (аваррин, даргийрин,­ къумукьрин лезгийрин, лакрин, урусрин ва ногъайрин) яшайишдин кье­тIен­ви­лерихъ галаз  таниш жедай  майданар ачухда. Абурун сергьятра аваз, хипехъанвилин хилен суьрсетдикай гьазуриз жедай шейэр (кIуртар, гамар, халичаяр, чивекар, чантаяр ва икI мад)  майдандиз акъудда, абур гьазуриз, гьа  жергедай яз, гам храз чирдай мумкинвал жеда. Санлай къачурла, культурадин программа девлетлуди хьун гуьзлемишзава: ина концертар, конкурсар, жинсинин гьайванрин  аукционар кьиле тухуда,  халкьдин художественный сеняткарвилерин выставкаяр ачухда.

Мярекат кьиле физвай йикъара, гьелбетда, лапагрин якIалди къенепатан ва къецепатан базарар таъминарунин, сар гьасилунин ва маса гунин, гьакIни  са жерге маса месэлайриз талукь илимдинни тежрибадин конференцияр, элкъвей столар  тешкилда. Санлай къачурла, жинсинин лапагрин выставка хуьруьн майишатдин зегьметчияр ва республикадин агьалияр, мугьманар патал халисан сувариз элкъуьн гуьзлемишзава.

Эхирдай фикир желб ийиз кIанза­вай мад са месэла ава: Россиядин жинсинин хиперин ва цIегьерин XXV выставкадин сергьятра аваз, аялрин яратмишунрин кIвалахрин «Зи хеб» («Моя овечка») конкурс малумарнава. Конкурсда Россиядин гьи региондай хьайитIани тир аялривай ва жаван­ривай (18 йисан яшдив агакьдалди) иштиракиз жеда. И кар патал абуру шикил, шиир ва я чубандин, хипехъан­дин яшайишдикай гьикая агакьарун лазим я.

Къимет гудайла, яшдиз килигна, пайнавай пуд дережа фикирда кьада: 7 йис жедалди; 7-12 йис; 23-18 йис.Конкурсдин кIвалахар авай электронный файлар ва арза (тIвар, яш ва амай делиларни къалурна) 14-майдалди агъадихъ галай адресдиз кьабулда: conf@fancrd.ru.

Конкурсдин гъалибчийрив шабагьар, Россиядин жинсинин  лапагрин выс­тавкадин сергьятра аваз,  17-майдиз сегьнедал вахкуда.

Жасмина Саидова