СтIал Сулейманан райондин Ялцугърин хуьруьхъ еке ва баркаллу тарих ава. Ватандин ЧIехи дяведин и хуьруьнвийри чеб халис кьегьалар, ватанпересар яз къалурна. 75 кIвал авай хуьряй 67 кас фронтдиз фенай.
ЧIехи Гъалибвилин 80 йисан юбилейдихъ галаз алакъалу яз Дагъустандин халкьдин шаир Майрудин Бабаханова, архивра ва маса чешмейра къекъвена, райондай дяведа иштиракай кьегьалрикай тамам делилар кIватI хъувуна. Дяведа райондай 5000-далай виниз инсанри иштиракна. Абурукай Майрудин Бабаханова ктаб акъудзава.
М. Бабаханова кIватIай делилралди, Ялцугърин хуьряй фронтдиз 95 кас фена. Гзафбур гьукуматдин шабагьриз лайихлу хьана. Къе чаз цIийиз жагъанвай са шумуд касдикай делилар гъиз кIанзава.
Бейдулаев Бадурхан Бейдулаевич, 1919-йисуз Ялцугърин хуьре дидедиз хьана. 1939-йисуз Баку шегьердин Молотовский РВК-дай армиядиз эвер гана. Капитан. 1944-йисан 30-сентябрдиз телеф хьана. Польшадин Краковдин воеводстводин Бескид хуьре кучукнава.
Мавердиев Ханверди, 1918-йисуз Ялцугърин хуьре дидедиз хьана. 1938-йисуз Баку шегьердин Сталинский РВК-ди армиядиз эвер гана. Старший сержант. Адахъ 3-дережадин Баркалладин орден, «Женгера лайихлувилерай», «Дирибашвиляй» медалар авай. Дяведилай гуьгъуьниз кьена. Белиждин станциядин сурара кучукнава.
Эседов Стефехад, 1910-йисуз Ялцугърин хуьре дидедиз хьана. 1941-йисуз Кьасумхуьруьн РВК-ди эвер гана. Жергедин аскер. Адахъ «Яру Гъед» орден, «Дирибашвиляй». «Женгера лайихлувилерай», «Сталинград оборона авунай», «Германиядин винел гъалиб хьунай» медалар авай.
Рамазанов Девлетхан, 1902-йисуз Ялцугърин хуьре дидедиз хьана. 1942-йисан январдиз Кьасумхуьруьн РВК-ди эвер гана. Жергедин аскер. Адахъ «Женгера лайихлувилерай» медаль авай. 1944-йисан 22-мартдиз Волждин областдин Коваль шегьердин патав телеф хьана.
Жалилов Халид, 1913-йисуз Ялцугърин хуьре дидедиз хьана. 1942-йисан 20-январдиз Кьасумхуьруьн РВК-ди эвер гана. Жергедин аскер. 1944-йисан 24-июндиз хьайи хирерикди кьена. Белоруссия ССР-дин Гомелдин областдин Рогачев райондин Близнецы хуьре кучукнава.
Ватандин ЧIехи дяведа иштиракай ялцугъвийрикай рахадайла, къейд ийиз кIанзава хьи, Майрудин Бабаханова меслят гуналди ва адан куьмекдалди и цIарарин авторди алай вахтунда Ялцугърин хуьруьн тарихдикай ва ялцугъвийрикай ктаб гьазурзава. Гьа ктабда ялцугъвияр тир 95 кас дяведин иштиракчийрикай тамам делилар гьатда.
М. Бабаханова лагьайвал, тарих хуьн, ам гележегдин несилрал агакьарун, Ватандин аслу туширвал хвейи, гъалибвал къачур кьегьалрин тIварар рикIера хуьн гьар садан буржи я.
Хазран Кьасумов
