Чаз Абдулмежидов Абдулмежид Абубукаровичалай чар атана. Ада Дербентдин педучилище, ДГУ-дин филологиядин факультет акьалтIарна. 53 йисуз муаллимвал авуна. 1974-йисалай 2007-йисалди Вини Тагьирхуьруьн мектебда директорвиле кIвалахна. Алай вахтунда ам пенсияда ава. Ада вичин фронтовик бубадикай икI кхьизва:
«Зи буба Абубукар Абдулмежидов 1909-йисуз Мегьарамдхуьруьн райондин Хакийрин хуьре дидедиз хьана. Ватандин ЧIехи дяве гатIунай 1941-йисуз ам армиядиз фена. Фашистрин винел Гъалибвал къачуник ада вичин пай кутуна, кьегьал дагъвиди хьиз, женгера иштиракна, Ватан хвена. Ада лишанчийрин 742-нумрадин полкунин 164-нумрадин дивизияда къуллугъзавай. Гьайиф хьи, зи бубадиз, хейлин маса кьегьалриз хьиз, элкъвена багърийрин патав хтун кьисмет хьанач. Ам 1943-йисан 5-сентябрдиз нубатдин женгина телеф хьана».
Хизандал агакьнавай документрай малум хьайивал, Абубукар Абдулмежидов Смоленскдин областдин Ельнядин райондин Передельники хуьре стхавилин сурара кучукнава.
«Бубадин сурал фин, анал хайи чилин накьвар тухун, экуь къаматдиз икрам авун зи мурад тир. Завай хьаначтIани, бубадин сурал хтуларни галаз зи хва фена. Лезгистандин накьварни тухвана, зи ферз кьилиз акъудна», — лугьузва А. Абдулмежидова.
Вичин чар ада Ватандин ЧIехи дяведа телеф хьайи Абубукар Абдулмежидован экуь къаматдиз бахшнавай «Смоленскдин чил» шиирдалди акьалтIарзава.
Смоленскдин чил. Смоленскдин чил.
Гьикьван аскерар кьабулна вуна?
Аквазвач стхавилин сурарин а кьил,
Алуддач рикIелай кьегьалар чна…
Виш йисара сагъ тежедай хирер
Амукьда багърийрин рикIера даим.
Несилрихъ галама кьегьалрин руьгьер,
Куьмек гуз легьзейра, хьайила лазим.
Стхавилин сурал, акъвазна метIел,
Хцини хтулри ийизва икрам.
Виш йисара аламукьда рикIелни мецел,
Куь кьегьал крар хъжеда давам…
Шукур хьурай Аллагьдиз, чаз бубадин сур
Жагъурдай, аквадай авунай кьисмет.
Кими жедач садрани Гъалибвилин нур,
Ватан хвейи кьегьалриз ийизвай гьуьрмет!
Чи мухбир
